بلوچ آجوئی دوست راہشون و بلوچستان لبریشن فرنٹ نا کماش ڈاکٹر اللہ نزر بلوچ تینا درشان ئٹی مستونگ نا تدینی آ افسوس کرسا پارینے کہ کنے داڑا سخت ڈکھ مسّنے ہراڑے اسہ ریاست ئس ائی ای ڈی جلہو ئسیٹ اسکول آ ہنوکا مہسوم آ چُنا تا ساہ ئے بےدڑدی ئٹ ہلکُنے۔
اونا پاننگ اس کہ دہشت گردی نا دا نامڑدی آ گام بندغی نا برخلاف اسہ بھلو ڈوہ ئس ءِ و بندغی حق آتا پھاش لتاڑ نا اسہ پین مثیل ئس ءِ۔ دا اُست ہسون آ تدینی ننے سوچنگ آ بیوس کیک کہ ننا دشمن اَرا کچ اسکا بےشرف و نہار ئس مسّنے ہرا نا دُو تان ننا چُھناک ہم رکھوک افس۔
او پارے کہ دا وڑ ئنا رستری جلہوک پاکستانی ریاست نا بلوچ آجوئی نا جہد ئے شیف کننگ نا چم ءُ۔ دافتہ مذہبی زوراکی نا پِن تننگہ یا پین پِن ئس ولے دا غُٹ ئنا پد ئٹی سِدّھا پاکستانی ریاست نا دُو ءِ۔ دا جلہوک نہ بیرہ بلوچ اُلس ئنا برجاء غا ویل آتہ پھاش کیرہ بلکہ سال آتان برجاء زوراکی، ظلم و بندغی حق آتا لتاڑ نا ہم درشانی ئے کیرہ۔ زوراکی نا بیگواہیک، بےقانودی کھسفنگ آک و غُٹ وڑ ئٹ سزا تنّنگ نا چم آتان کوزہ گیر پاکستانی ریاست بلوچستان ئٹی خُلیس و ہِنڑز ودی کننگ نا کوشست کننگ ئٹی ءِ۔
بلوچ راہشون پارے کہ پاکستانی ریاست نا دا زوراکی نا چم آتا گْواچی مروکا ہزار آ خاہوت آک تینا بندغ آتا زند ئنا خیرات خواہِسہ برانزی کیمپ و کسر تا وخت گدرینگ آ بیوس ءُ۔ دا بیوس آ خاہوت آتا حالیت بلوچ اُلس آ مروکا ظلم و تادی تا اسہ عکس ئس ءِ ہرا ہر بندغی ضمیر ئے سرفک۔
ڈاکٹر اللہ نزر بلوچ مُستی پارے کہ پاکستانی ریاست نا پاسو آن مذہبی انتہا پسندی آن بلوچ اُلس ئے پرغنگ کن و اونا جہد ئے چھٹّفنگ کن سِلاہ نا وڑ ئٹ کاریم ہلسہ بےسوب مسّنے۔ بلوچ اُلس ہر وڑ ئنا زوراکی تا مونا سلِسہ آجوئی نا جہد ئٹی تینا سوگوی و جوزہ نا درشانی کرینے۔ اونا دا جہد کیہی قربانی تا میوہ ءِ، ہرافتیٹ نیاڑیک، چُناک و ورناک ہم اوار ءُ ہرا تینا نہادی آ ساہ تہ ندر کرسا راج ئے زوراکی نا برخلاف بش مننگ نا وس تسّر۔ بلوچ شہید آتا دا قربانیک اوفتا جوزہ آتا درشانی ءِ۔ ہر شہید نا قربانی آن راج ئنا جوزہ ٹی پین ودّکی بسّنے۔ ظالم آ ریاست نا غُٹ چم بازیک بےسوب مسّنو و بلوچ اُلس ئنا آجوئی نا جہد دے پہ دے آ سوگو مننگ ئٹی ءِ۔
بلوچ راہشون پارے کہ ای مستونگ تدینی آن زیمی مروکا خاہوت آتا ڈکھ ئٹی اوفتتون اوار اُٹ اوفتیکن اُست ئنا ارمان نا درشانی کیوہ۔ اوفتا نسخان لوزآتیٹ پاننگ مفک ولے ننے اوفتا ڈکھ ئنا مارشت ارے و اوفتون اوار سَلوک اُن۔ ٹھپی آتا زوت ڑراخ مننگ کن دعا تون اوار ای جہانی مخلوق آن خواست کیوہ کہ او بلوچستان ئٹی برجاء ریاستی زوراکی نا زیہا سوبری ئٹ گام ہفّر۔ بلوچستان نا محکوم آ اُلس آجوئی نا ہرا جہد ئٹی آختہ ءِ، اوٹی اودے کمک بکار ءِ۔ نن جہانی مخلوق آن انصاف نا اومیت تخنہ کہ او بلوچ اُلس ئنا آجوئی نا حق ئے منّسہ اونا جہد ئنا حوالہ ئٹ توار ہفور۔
