نوشتہ کار: اختر ندیم بلوچ
مٹ: گندار بلوچ
زرمبش نوشتانک!
لمّہ! ای چُنک اسُٹ، خنِس کنا بھاز آ تہارمہ غا خیال آک مریر ولے حاجی صاحب کنے تیار کرے ”بچا! تیار مر کانہ“۔ ای خوش مسُٹ۔ ای اندا سرپند مسُٹ کہ کُل کنا ہمسر آک کوہ ءِ مراد آ زیارت آ ہنانو، حاجی صاحب کنے ہم دیک، ولے حاجی نا پاننگ اس : ”بچا زیارت آ آنہہ نُما لیڈر نا سال پوروی مننگ ءِ بھلو مُچی ئس مننگ ءِ۔“
ای ہبکہ مسُٹ ”ابا گڑا اَراتم کانہ۔“
”اینو بس بریک کانہ۔“ ای خوش اسُٹ۔ دا سوب آن نہ کہ ای تینا لیڈر نا سال پوروی نا مُچی ٹی اوار مننگ اسُٹ۔ ای گیشتر دا سوب آن خوش اسُٹ کہ ای تربت آ ہِننگ اُٹ۔ بھاز ہُرے متو بس ئس بسک نن سوار مسُن۔ کنے کُل بی ایس او نا سنگت آک مہر تننگ اسر۔ کنا خیال آ کنا سن ئنا بیرہ ای اسُٹ و کماش انگا بندغ حاجی صاحب اس اندا سوب آن بس ئٹی گیشتر بندغاک دلگوش اسر۔ کنے مہر تننگ اسر۔ نن تینا خلق آن مُرے ہنتوسن کہ گھڑاپارہ مس چیست چاست مس، بس سلیس کُل ہبکہ و حیران مسر کس ہچ پُہہ متو کہ انت مس ولے کُل شیف دھڑنگار۔ بس ئنا شیف ئے ہُرار، حاجی پائے: ”دا بس کن ہُریسکان تولِن کنا خیال آ سنگت آک ہر کس تون موٹر سائیکل ارے گُڑا ہِمت کیر آواران اسکان کانہ اوکان مُستی سواری باز مریک۔“
او زمانہ ٹی پیر و ورنا کُل بی ایس او نا باسک اسر، زمین زادگ، آجوئی نا نعرہ خاک آسمان ئے کاٹُم آ ہرفیسر۔ ننا خلق ئنا غٹ بندغاک سائیکل آتے ہرفیر، راہی مسر آواران آ۔ کنے یات ءِ کہ نن آوران اسکان سائیکل آ ہنان۔ ولے آواران آن کیچ اسکان نن امر سر مسُن دا کنا اُستا بفک۔ کیچ ئنا کالج اس۔ مُچی اس، جلسہ مس۔ شھید اکبر خان بگٹی نا ہیت آک بندغا تے دوست بتوس۔ ایسا کومی نا شئیر ہم کنے دوست بتو۔ کنے بندغ ئس ”کامریڈ“ پارے، کنے دا ہیت ہم دوست بتو، ای بد دریٹ۔ حاجی صاحب کنے سرپند کرے کہ دا بد ؤ ہیت ئس اف، سنگت ئے پارہ کامریڈ۔ پد آ ہر سال ننا اسکول و کالج نا زمانہ ٹی فِدا ڈے المی اس۔ نن دا دے ئے تورین ولے اے زمانہ ٹی سیاسی پرشت و پروش، و (مفاد آتا) مِڑ و جنگ ئنا واری اس۔ گُڑا اندا گل کہ اونا بنداوی خِشت ئے تخنگ ئٹی فِدا شھید اوار اس ”ھئی و مینگل“ نا پِنا اِرا بشخ مس۔ اندن کہ حاجی صاحب نا کہول مینگل صاحب نا منّوک ئس اس، ای ہم مینگل گروپ نا بشخ ئٹی ہِناٹ۔
ولے ننا مُست ئنا جوزہ رہینگتو۔ نن ووٹ ئنا مشین اسُن۔ ووٹ آک کہ خُڑک مسُرہ گُڑا ننے کاریم رسینگاکہ۔ خواجہ غا تا ووٹ و مشخولی اس۔ پین ای تپرہ، بس نن تین پہ تین ئے کھٹینگ نا جہد ئٹی اسُن۔ 98 نا ایٹمی تراک آک اندن پا چاغی آ متور کاری باسِد نا اُست ئنا بند آ مسُر۔ ننا چیئرمین نواز شریف نا پروگرام نا پروموشن کننگ اس۔ بی ایس او نا سرکل آن گڈ ای یونیورسٹی نا مونغی آن پیشتماٹ کہ اینو کاوہ ھئی گروپ نا بی ایس او ٹی اوار مریوہ۔ ای سنگت ئسے تون ڈک کُگٹ، تینا نیک انگا اُست خواہی ئے اودے پاریٹ۔ سنگت بُڑز ؤ ٹہک ئس خلک و پارے : ”بابا الّے نا پارٹی انگہ جوان ءِ انداخس ارے کہ اطاء اللہ نا پِن تُد ئے تہ۔“
ای مونجا مسُٹ و پاریٹ: ”ای ہمو بی ایس او نا بشخ اُٹ ہرادے کہ واجہ اَطاءاللہ نا پِن ہم تُد الو“۔ سنگت پدا ٹہک ئس تس و پارے: ” نی، ہِن روزگار ئس کر۔ کنے اسلم جان گچکی نا ہیت اُستا بس۔ یار ندیم نی کمال کیسہ، نی بریسہ فلانی ئے ٹیکی ئس ایت، فلانی ئے نوکری ئس ایت۔ *حاجی صاحب تون اراڑے امروز نا مڈی تُد ءِ۔ اگہ نوکری خواہسہ تینٹ کر، اگہ نوکری کپیسہ ٹیکھداری تینٹ کر۔ داسا نی ورنا اُس مفت ئٹ انتئے تینے عزاب کیسہ۔ دا کامریڈ مننگ داسا مسخرہ ئس ءِ و کوچرائی ئس ءِ۔“
دا ہیت آن پد ای بس لانک تفیٹ کہ داسا المی کاریم ئس کروئی ءِ۔ کن کہ چُنکو نوکری ئس کننگ ہم اڑزان الو۔ انتئے کہ ای بھاز بھلو بھلو ہیت کریسُٹ۔ کاروبار کن سرمایہ خواہک ہرا کنا رہا اف۔ داسا کمیشن نا تیاری کروئی ءِ۔ جوانو نوکری ئس کروئی ءِ ولے ای زہنی حساب آ اسُل تیار الوٹ کہ سیاست آن مُر مریو۔ کنے پاننگ مسس کہ فدا وطن کن شہید مسنے۔ کنے پاننگ مسس حمید وطن نا سالونک مسنے۔ کنا زہن ئٹ نشخ اس کہ نواب نوروز خان تینا ہفت انگا ہمراہ تتون اوار بلوچ سرڈغار آ ندر مسنے۔ نی ہم کولیگ مر۔ کنا ارواہ بلوچستان تون تفوک اس۔ ای پنجمی جمائت ئٹی خواننگ اسٹ۔ حاجی صاحب ایلیمنٹری کالج اوتھل ئٹی اس۔ اونا چٹھی ئس کن کہ بس، کہ دیچا اراکان حاجی صاحب اسہ شئیر ئس پٹاسس و کن کہ راہی کریسس:
چمن والو خدا ٍھافظ قفس میں لے گئی گردش وطن پہ چھاگیا اندھیرا تو میرا گھر جلا دینا“
حاجی کنا اسکول آ ہِنوکا ءِ ٹالکی سئیکل ئے ہم خیسنو رنگ تننگ خواہسکہ کہ آشوب نا پیدواری ءِ۔ ولے کنے خلق ئنا مارک اندن کُنّت کریر، ای حاجی ئے پاریٹ: ” نی اگہ سائیکل ئے کنا خیسنو رنگ تسُس ای اسکول آ ہنوفٹ۔“
کنا خیال آ ای سر ھال آن پیشتمنگ اُٹ ولے ای منیپرہ۔ انتئے کہ اینو فدا ننا سرحال ءِ۔ ایہُن فدا تینا شہیدی آن ہلیس کہ اینو دے اسکان مکران نا پارلیمانی سیاست کار آتا پِڈ ءِ۔ دافتا اندا دروغ آ سیاست نا بھرم ءِ کہ ای بھاز وختا جیڑنگ آ بیوس اسٹ کہ فدا راج دْروھی کرینے، فدا بی این وائی ایم جوڑ کننگ نا مطلب اندا مسنے کہ بلوچ راجی آجوئی ئے سوگو آ جنز ئنا کسر آن کشنگ و بلوچ راجی باندات نا واپار خلنگ و بلوچ ورنا تے شعوری سیاست آن کشگ و زہنی شل جوڑ کننگ ءِ۔ کنا خیال آ راستی انداد ءِ۔
ای ہُرے ئے واجہ ابدُلنبی ئے سوج کریٹ : ”واجہ ! نُم چائسُرے کہ بیدس شعوری سیاست آن قومی آجوہی نا جہد ئنا مزل آ سر کننگ ممکن الو۔“
لمہ! بنداو آن بندغاک بلوچ خوانندہ، و سیاست تون سیالی تخوکو بندغ مریر۔ چائے لس مخلوق مرے, ہر کس تینے کشیک و اندا بلوچ نا سیاسی بشخ و ونڈ کننگ ئے سڑدار آتا بشخ آ ایتک۔ وجہ یا سوب آک دا مفسہ۔ سڑدار آتا سائیکی انداد ءِ کہ کس ئے خن ئٹی ہتپسہ۔ دا اسٹ ایلو ئے منیپسہ و پین ادارہ جوڑ کپسہ و نئے سگیرہ کہ پین کس ادارہ سازی کے۔ بزاں بلوچ نا زی آ انت کہ کہِر ئس نازل مسنے اونا کاٹم آن ہلیس نت اسکان ذمہ وار سڑدار آک مسنو۔ داسا حساب ہلنگ خواہک، بقول بے بئے آ مشرف کہ مُسہ سڑدار ءُ کہ پاکستان نا روتہ غا تے تھڑنگ ءُ۔ ایلو کُل سڑدار آک پاکستان نا ہمراہ ءُ و بلوچ نا گلہ ہم اندا سڑدار تیان ءِ۔
اوفتا دو ٹی مسنے ولے او ادارہ جاتی سیاست نا کسر ئے بند کرینو انتئے کہ ادارہ ٹہفر گُڑا سڑدار نا دسترس جہد آن ایسر مریک۔ گڑا، ہر وختا بلوچ نا کُل بیوسی تا ذمہ وار سڑدارک ءُ۔ چاس کہ اندا مُسہ سڑدار۔ ایلو بلوچ خوانندہ زانت کار بقول فدا نا واپاری ”مکرانی مڈل کلاس“ کُل بے میار اسر۔ داسا سوج نا ءِ کہ جیڑہ نا ماس انت ءِ ؟ اندا ادارتی سیاست نا ماس ای پاوہ، بُن ھشت بی ایس او نا مسنے۔ پد آ لس مخلوک ئٹی بی این وائی ایم نا بناء مس۔ نن کہ جیڑہ و جستجو بناء کرے گڑا ای اندا جاگہ غا سر مسُٹ: ”بنو کہ بی این وائی ایم نا جوڑ کنگ نا سوب و اداراتی سیاست متنے بلکن واجہ کار آتا آجوئی نا جہد آن دو کشنگ نا اسہ نیمون ئس مسنے۔ ورناک نعرہ ئے آجوئی نا خلیرہ ولے راہشونک سدھا اوفتے پاکستان نا تہار آ دھون ئنا وڑ انگا پارلیمان آ دیرہ سر کیرہ۔ دا ہیت کہ ای مارِسُٹ، پُہہ مسُٹ، گُڑا پدا کنا آئیڈیل الو۔ وختس کہ نن ڈاکٹر اللہ نزر نا سروکی ٹی جہد بناء کرین گڑا ننا اولی نعرہ دَر پارلیمانی سیاست اس۔ ننا ہیت بنداو ئٹ نزور اس ولے پدا ہم کس ننا (موقف) ئے رد کتو۔ اندن کہ ڈاکٹر ساحب تینا سیاسی نظریہ ئے خواجہ جان محمد دشتی ساحب نا مونا تخا، گڑا خواجہ پارے : ”ڈاکٹر ساحب نی اگہ اِرا سال تینا ہیت آ سلوک مسوس و ہست مسوس گڑا ہُرس بندغ آک باور کرور، ولے نا سیاست مہالو ایسر مرو یا نا جند۔“
ننا چاؤک آ بندغ آتا نن کن دا پاننگ اس، خیر ! جہد بناء مس بی ایل ایف نا بنداوی خشت تخنگ نا سوب ہم پیر انگا سنگت آک اداراتی سیاست پاریر۔ ولے بلوچ نا بخت آ راست انگا سیاست و ادارہ آتا تاغت اسہ بندغ نا اجارہ داری آ زوراک تر مرے، اسہ گچینو تُغ ئس اسک و اسہ گچینو اومیت ئس اسک۔ نن کاریم بناء کریسُن، واجو بھاز آ جاگہ غا تیا فِدا نا درور تس کہ بلوچ نا سیاسی پُہہ و سرپند آ بندغ مسنے۔ بلوچ نا پھگہ نا سرپند ؤ بندغ ئس مسنگ۔ دشمن ئے کسر آن مُر کرینے۔ وختس نن مکران آ کیمپ کننگ کن ہنان، کاریم بناء مس۔ کاریم تیکن کنا ہن ءَ بر گیشتر بلوچستان نا جتا ہند آتیا مسکہ۔ گڑا ای مچٹ وخت آن پد خناٹ، منَہ متکنو و بے بئے مروکو ولے ایماندار ؤ کامریڈ کیمپ ئٹ ساڑی ءُ۔ دے و نن سیاسی ہیت ئنا ماس فِدا آن بناء مسکہ، و ایسر ہم فِدا غا مسکہ۔ ولے کنا مغز ئٹ ہیت آک تولتوس۔ پدا کہ خواجہ سدو کنے حمیدان، دلی، جلاتان تون آشنا کرے کہ یار داسا ہُر۔ ای بی ایس او نا باسک مسونٹ، ولے ای ہمو بندغ آتیان چٹ بے سما اسٹ کہ جنگ ئٹی شہید مسنو۔
