بلوچستان نا ضلع ہرنائی ٹی چھار بندغ نا جونک خننگانو ہرافتہ سُمکاری کرسہ کھسفنگانے، پاکستانی لشکر دا بندغ آتے اسہ کاروائی ئسیٹی خلنگ نا دعوی کرینے واہم چھار بندغ آن اسٹ نا چائندئی مسنے ہرادے پاکستانی لشکر مہالو آن اونا اِرا مار ئتون اوار زوراکی ئٹ بیگواہ کریسس۔
حوال تروکا تا رد ئٹ اسہ جون ئنا چائندئی سعید مری نا پن ئٹ مسنے ہرادے اونا اِرا ورناؤ مار ئتون اوار زوراکی ئٹ بیگواہ کننگاسس۔
اونا بھلا مار عبدالنبی مری نا جون ئے پاکستانی لشکر 18 اپریل آ دکی ٹی خساسس و دروغ ئنا مونتس نا پِن تسس۔ اونا چُنکا مار وارث مری نا جون ئے پاکستانی لشکر 1 مئی آ سنجاوی آ خساسس و اودے ہم دروغ ئنا مونتس ئٹ خلنگ نا دعوی کریسس۔
اینو سعید مری نا جند ئنا جون خننگانے ہرادے ہرنائی سنجاوی روڈ طور خام آ پین مُسہ بندغ تون اوار خسنگانے۔
حوال تروکا تا رِد ئٹ دا جونک ہرنائی نا علاقہ سنجاوی روڈ آ طور خام نا ہند آ خننگانو ہرافتا جون تیا سُم تا نشانک پھاش ءُ۔
پاکستانی لشکر نا پاننگ ءِ کہ ڈھکوک ایجنسی تا حوال تننگ آ کاروائی ئسیٹی چھار بندغ کھسفینُن۔ واہم دا خُلیس نا درشانی مننگ ءِ کہ مننگ کیک ایلو مُسہ بندغ ہم مُست آن زوراکی ئٹ بیگواہ کننگوک مریر ہرافتِہ دروغ ئنا مونتِس ئٹ کھسفنگانے۔
