بلوچستان نا ضلع مستونگ ئٹی سلاہ بند جلہو ئٹی پاکستانی لشکر ئے ٹک کننگانے۔ جلہو آن پد علاقہ ٹی ہیلی کاپٹر آتا ہِن و بر برجاء ءِ۔
مستونگ نا ہند اسپلنجی ٹی دَرو پاکستانی لشکر لشکر کشی کن بھلو کچ ئسیٹی پُترینگانے۔ اِستو لشکر نا کاوان ئے اسپلنجی نا ہند مَرو کنڈ ئٹی سلاہ بند بندغ آک بھلو کچ ئسیٹی سنگر ہلیسہ جلہو ئٹی ٹِک کرینو۔
ہندی بندغ تا رد ئٹ سخت سُمکاری کننگانے و تراک نا توار مسنے و پدا سہب اسکان سُمکاری نا لڑ برجاء مسنے، ہندن علاقہ ٹی ہیلی کاپٹر آتا ہن و بر برجاء ءِ۔
جلہو ئٹی لشکر ئے جانی نسخان ہرفوئی تمانے ولہ داسکان کالخواہ تا نیمہ غان دا حوال پک کننگ متنے۔
داسکان دا جلہو نا زمہ واری ئے ہچو تنظیم ئس ہرفتنے۔
