دانک
نوشتکار : ڈاکٹر اللہ نزر بلوچ
مٹ : شئے رحمت بلوچ
انتونیو گرامچی نا دا قول کہ “دیہاڑ ئٹی انسان ساندہ اِرا تاغت آتا نیام ئٹ مریک: یاتو او ظلم کروک آتتون مریک یا کہ ظلم سگھوک آتتون، غیر جانب مننگ اسہ خام خیالی ئس ءِ۔ ننا وطن ئٹی ہم اسہ جنگ ئس برجاء ءِ۔ ہراڑے کوزہ گیر و کوزہ مروک آ راج آک مون پہ مون ءُ۔ اگہ نن دیہاڑ(تاریخ) نا پنّو آتیٹی پٹّین تو خننہ کہ کُل زالم و کوزہ گیر آ تاغت آتا طریقہ کار اسہ وڑ مسُنے۔ او ریاستی تاغت و مالی وسائل ئٹ خلیک کہ اوفتا مزاحمت دوارہ کاٹُم ہرفنگ کپ۔
مظلوم آ راج آک، ہرافتا زمین، جغرافیہ، رسم و دود، زبان و مزاحمتی آ دیہاڑ جِتا مریک، تینا جہد ئے جوانو وڑ ئسے ئٹ زندہ تخرہ۔ وخت ئنا رد ئٹ جتا اِنگا محکوم آ راج آتا جنگی و سیاسی ہیلہ غاتے تینا جہد ئٹی کاریم ئٹ ہتنگ کیرہ، ولے ہر راج ئنا تحریک اونا جفرافیائی دود و ربیدہ و دیہاڑی زاویہ غاک جتا مریرہ۔ سَوب ہندادے کہ بلوچ راج ئنا آجوئی نا جنگ و دود ربیدہ نا کسہ غاک ایلو راج آتا تحریک آتیان جتا ءُ۔
کوزہ گیر آک ساندہ تاغت نا نشہ ٹی مظلوم آ راج آتا جغرافیائی و ثقافتی آ چائند ئے گوئنگ خواہِرہ۔ داڑے سوال ودی مریک کہ دشمن ئے بیرہ توفک نا بیرل ئٹ مات تننگ مریک؟ کنا خیال ئٹ، جنگ ئتون اوار اوار دشمن نا ہر گندہ غا عمل آتے جہموری، سیاسی و سفارتی محاذ و ادب نا کمک ئٹ پاش کننگ الّمی ءِ۔ دشمن نا کنڈ آن بندغی حق آتا لتاڑ آتے جہانی پِڑ آ وے پڑدہ کننگ ہم المی ءِ، تاکہ اونا گندہ غا پالیسی تے پاش کننگِہ۔ ای تینا ہمرہ تے ساندہ پاوہ کہ ننا جہد بیرہ اسہ گوریلا جنگ ئس افک بلکہ اسہ بھلو کچ ئنا جنگ ئس ءِ، ہراٹی بلوچ نا ہر فرد ئے تینا بشخ ئے شاغوئی ءِ۔
ڈیبرے پائک ”اگہ نی دشمن نا ماڑی نا اسہ خشِت ئس بٹِس، نی اوڑکن باغی ئس جوڑ مریسہ۔” اینو نا دنیا بندغ نا آسراتی نا رد ئٹ بھاز دیمروی کرینے، ولے کوزہ گیر و مظلوم نا سیالیک دائسکان ہم ہمو وڑ وے رحم ءُ۔ دشمن جہانی قانود آتا رد ئٹ پارنگوکا گسٹاپو طریقہ کار آ عمل کرِسہ بلوچ ورنا، پیر، کماش و زالبول آتے برمتہ کرِسہ جون تے خسک و جنگی نفسیاتی چم تے کاریم ئٹ ہتیک تاکہ بلوچ راج ئے اسٹ ایلو نا مقابل ئٹ سلِیفگ کے۔ ولے بلوچ راج گدرینگوکا اِرا دہک ئٹی دشمن نا ہندن ہمت ئٹ مقابلہ ئے کرینے کہ او تینٹ نفسیاتی شکست نا گواچی مسُنے۔
کنے پک یقین ءِ کہ بلوچ جنگ بلوچستان نا آجوئی نا دوئی مننگ اسکان برجاء مرو۔ کُل آجوئی خواہوک تنظیم و مُہبر آتا شرف و اواری دا تحریک نا سرسوبی کن الّمی ءِ، فرق آن بیدس تنظیمی و سیاسی خڑکی آجوئی نا جہد ئٹی ساہ ندر کروکا کُل شہید آتا قربانی تے یاد تخنگ و کسر نا رژنائی جوڑ کننگ المی ءِ، انتئے کہ تنظیمی، سیاسی، قبائلی یاکہ پین اسہ بنیاد ئسے آ شہید آتے ونڈ کننگ راج ئسے نا تباہی نا سوب ءِ۔ اینو نا دور ئٹی انفارمیشن ٹیکنالوجی ئٹ دشمن نا دروغ و قابل نفرت بیانیہ نا جواب تننگ ہم المی ءِ، تاکہ اونا گندہی آن پُر گپ آک اوڑکن شرمندہی نا سوب جوڑ مریر۔
ایسر ئٹی سن زو نا قول ئے ساندہ یاد تخیرے: ” اگہ نی تینا نزوری و تاغت آن واخب اُس و دشمن نا نزوری و تاغت نا علم ئے تخسِہ، گُڑا نی سرسوب مریسہ و دشمن بے سوب مریک۔” دا حکمت عملی ئٹ نن تینا تحریک ئٹی سرسوبی دوئی کینہ و دشمن ئے بے سوب کینہ۔
