بلوچ اسٹوڈنٹس ایکشن کمیٹی نا اڈ تروکا ارا دے ئنا صباء دشتیاری ادبی و علمی فیسٹیول عطاء شاد ڈگری کالج تربت ئٹی بنا کننگا۔
بنا ٹی تربت یونیورسٹی بلوچی بخش ئنا لیکچرار پروفیسر بالاچ بالی صبا دشتیاری نا علی و ادبی خذمت آتا مقالہ خوانا۔ تعلیم نا سرحال ئٹ پینل ڈسکشن ہم بناء مس۔
پروگرام ئٹی صباء دشتیاری نا علمی و ادبی زند و اونا خذمت آتا ڈاکومنٹری پیش کننگا۔
پروگرام ئٹی بلوچی عہدی لبزانک نا سرحال ئٹ پینل ڈسکشن کننگا، اونا ماڈریٹر ورنا آ تنقید نگار جمال منظور مہمان پِنی آ ادیب و قلمکار بلوچستان اکیڈمی کیچ ئنا کماش غفور شاد اسُرہ۔
ڈاکٹر غفور شاد پارے کہ عہدی لبزانک ہر اسَہ راج ئنا علمی و ادبی مڈی کو۔ ہراٹی ہر راج ئنا کلچر، دیہاڑ، بولی و رسم و رواج آتون اوار مذہبی عقیدہ غا تا درشانی ارے۔
او پارے کہ بلوچ راج ہم عظیم ءُ ادبی مڈی و کلاسیکل شاعری نا میراث آتا خواجہ ءِ، ہراٹی بلوچ راج ئنا ہزار آ سال آ مُتکُنا تاریخ و ثقافت و چاگڑدی جوڑشت نا بخش اوار ئے۔
او اسِہ سوال ئسے نا ورندی ٹی پارے کہ نن داسہ نا وخت ئٹی مُتکن و کلاسیکل بلوچی ئے الِسہ ایلو راج آتا ادب ئے خواننگ بناء کرینُن، و تینا عہدی کلاسیکل آن بے سما اُن، ہندا سوب آن داسان نا شاعر آتیان کیہیک تینا بلوچی کلاسیکل شاعری آن بدر ءُ۔ ہندا سوب آن داسان نا شاعر تیٹی نُمے کلاسیکل رنگ خننگ بفک ولے ملا فاضل، سید ھاشمی، عطار شاد و غلام حسین شوکاز نا شاعری تِہ مون آ تِخن تو اوفتا تہٹی عہدی کلاسیکل شاعری نا رنگ جوانو وڑ ئسیٹ ارے۔
او مُستی پارے کہ داسان نا وخت ٹی ننا ورناک بائدے تینا کلاسیکل عہدی شاعری تِہ خوانِر و اوفتون تفوک مریر۔
او پارے کہ اینو آن چِل سال مہالو اسِہ خلق ئس ہم دونو الو کہ اوڑے اسَہ پیرو لُمہ ئسے کسہ آک یاد اسُرہ و نن نا اِرغ کُننگ آن پد ہر اُراٹی اوار مرسہ ہمو پیر ئنگا نیازی نا کسَہ خلکُرہ۔
پروگرام ٹی بک اسٹال نا تون اوار سائنسی و تصویری اسٹال ہم خلنگاسس، پروگرام ٹی جتا سرحال تا پینل ڈسکشن، مشاعرہ و میوزیکل پروگرام اوار اس۔
