نوشت: گل گدر
زرمبش براہوئی
سوشل میڈیا غا گڑاس بندغ ٹک ٹاکر ثناء یوسف و بلوچ طالب علم ماہ جبین نا اِرا جتاؤ ویل ئے بیٹ تننگ ءُ و گِلہ کننگ ءُ کہ ثناء کن پاکستانی میڈیا گُٹ ئے کاٹُم آ ہرفینے و ماہ جبین کن ریاست نا مین اسٹریم میڈیا ٹی کس ہیت کپک۔
سوج دادے کہ او ماہ جبین کن ہیت انتئے کیر؟ مگہ پاکستان نا میڈیا و میڈیا نا بندغ آک ہمو ریاستی مشنیری نا پُڑزہ افس ہرا ریاستی بیانیہ ئے سوگو کننگ کن توسُنو؟ سوج دادے کہ ریاست نا میڈیا و میڈیا نا بندغ آک ریاستی بیانیہ ئے سوگو کننگ کن توسُنو یا کہ ننا (بلوچ قومی) ویل ئنا زیہا ہیت کننگ کن؟ مگہ دا اندنو سختو سوال ءُ کہ نن دافتِہ پُہہ مننگ کپن؟
دا ہیت دے آن بار پھاش ءِ کہ ثناء پدرشاہی نظام نا گواچی مسنے و ننا گودی ماہ جبین بلوچ، ریاستی زوراخی نا۔۔۔ و دا ہیت ہم پھاش ءِ کہ ریاستی زوراخی نا زیہا ریاستی میڈیا اسُل ہیت کروف۔
واہم اگہ ہیت گلہ کننگ نا ءِ تو نن ریاست آن گلہ کپنہ کہ او ننا نیاڑی تِہ زوراخی ئٹ بیگواہ انتئے کیک۔۔۔ نہ کہ نن پاکستان نا عوام آن دا اومیت کینہ کہ او ننا نیاڑی تیکن ہیت انتئے کپسہ۔۔۔ دا تو اسہ نو آبادیاتی زہنیت ئس ءِ۔ ننے تینا زیہا مروکا ظلم و زوراخی نا برخلاف تینٹ ہیت کروئی ءِ۔
نن امر دشمن آن اومیت کننگ کینہ کہ او زوروخی کے ولے نیاڑی تِہ ریایت ایتِہ۔۔۔؟ سوج دا اف کہ او نیاڑی تیا زوراخی انتئے کے۔۔۔ سوج دادے کہ او ننا ڈغار آ، ننا اُراٹی، ننا ڈیہہ ئنا ہمرو ہم بھاتی ئس مرے؛ نرینہ، چُنا، نیاڑی، پیر، کماش۔۔۔ کس آ ہم او زوراخی انتئے کے؟ اسہ بِدر ئس برے نا ڈغار آ نے انتئے خن نشان ایتِہ ؟
اگہ او انداخس زوراخ ءِ کہ نا ڈغار آ نا ڈیہہ آ بریک کوزہ کیک و زوراخی نا وس تخک تو او نرینہ، چُنا، نیاڑی، پیر ئہ کماش کس ئے بخشپک۔۔۔ گُڑا نی نوآبادکار نا الس آن ہم دا گلہ کننگ کپیسہ کہ وختس اوفتا فوج و ریاست ننا چُنا نیاڑی تیا بے بندغیئو ظلم کیک، ننا نیاڑی تِہ بیگواہ کیک او انتئے چُپ مریرہ و تینا چُنا نیاڑی تیکن گُٹ ءِ کاٹم آ انتئے ہرفِرہ۔
نوآبادکار آن گلہ کننگ مفک، نوآبادیاتی نظام و کوزہ گیر آن گلہ کننگ مفک۔۔۔ اوڑان چُنا نیاڑی تیکن ریات نا اومیت کننگ مفک۔۔۔ اونا برخلاف جہد کننگ مریک و جنگ کننگ مریک۔۔۔ ریاست نا زوراخی نا برخلاف پین کس توار بُڑز کے یا کپ ولے ننے تینٹ توار بُڑز کروئی ارے، تینٹ ہیت کروئی ارے۔۔۔ پین کس ئنا چُپی ننے نسخان تے یا تِف ولے ننا جند ئنا چُپی نن کن مرگ ءِ۔
