بلوچ یکجہتی کمیٹی نا راہشون ڈاکٹر ماہ رنگ بلوچ نا ایڑ نادیہ بلوچ پارے کہ بلوچستان ہائی کورٹ اینو بلوچ یکجہتی کمیٹی و اونا دزگیر مُہبر آتا رد ئٹ مُسہ کیس ئے بِنگ۔
ڈاکٹر ماہ رنگ بلوچ نا برخلاف تھری ایم پی او (3MPO) نا رد ئٹ کیس ئے عدالت بِننگ آن گُڈ فیصلہ ئے محفوظ کرے، ہرا نا پگہ پڑو مرو۔
ڈاکٹر ماہ رنگ بلوچ نا جیل ئٹ رکھ و سلامتی نا رد ئٹ درخواست آ، عدالت آن استدعا کننگا کہ محکمہ داخلہ و جیل کوالخواک اوفتا رکھ ئنا باور ایتر۔ عدالت ذمہ واری ادارہ آتِہ ڈاکٹر ماہ رنگ بلوچ نا رکھ ئنا باور تننگ نا پنت تس۔
اندن ڈاکٹر ماہ رنگ بلوچ و صبغت اللہ شاہ جی ئے پین جیل ئسے آ رادہ کننگ نا معاملہ ٹی، عدالت حکم تس کہ اوفتِہ ساڑی آ جیل ئٹ تخنگ مرے۔ گل زادی بلوچ نا ایڑ ئتون قومی شناختی کارڈ الو، اندا سوب آن اودے دا درخواست ئٹ اوار کننگتو۔
اندن ایڈووکیٹ ساجد ترین نا کنڈ آن درخواست ئس تننگاسس ہراٹی تھری ایم پی او نا رد ئٹ 92 سیاسی باسک آتا دزگیری ئے چیلنج کننگاسس، ہراٹی بیبو بلوچ و ایلو باسک آک اوار اسُر۔
عدالت حکومت بلوچستان ئے پنت تس کہ چُنک سن و بیدس جواز دزگیر کننگوک آتِہ دمدستی آجو کننگِہ و اگہ غُٹ بندغ آتِہ آجو کننگتو تو دا نا سوب آتا رپورٹ ئس جمع کننگِہ۔
بلوچستان نیشنل پارٹی نا سروک، قانود چاؤک و بلوچ یکجہتی کمیٹی نا وکیل ساجد ترین ایڈووکیٹ تینا آفیشل “ایکس” (سابقہ ٹوئٹر) اکاؤنٹ آ پارے کہ اینو عدالت ئٹ ننا دلیل آتیان پد بلوچستان ہائی کورٹ حکومت بلوچستان ئے حکم تس کہ ڈاکٹر ماہ رنگ بلوچ، بیبو بلوچ، ماما غفار و 92 آن زیات باسک آتِہ تھری ایم پی او نا رد ئٹ دزگیر کروک دزگیری تا رد ئٹ اینو یلہ کرِسہ پگہ عدالت ئٹ رپورٹ پیش کننگِہ۔
