چین نہ بیرہ معاشی وڑئٹ زوراک مننگ خواہیک بلکہ اسہ بنیاتی و دریابی کسر ئسے آ ہم کوزہ کننگ خواہیک۔
بلوچ راجی زْرمبشت (بی این ایم) نا چیئرمین ڈاکٹر نسیم بلوچ اقوام متحدہ نا بندغی حق آتا پنجاہ و ہفتمیکو مجلس ئٹی ہیت کرسا بلوچستان ئٹی چین ئنا مُستی گھام خلنگ آ نغدکاری کرے۔
تموکو ڈویلپمنٹ کلچرل یونین(ای سی ایس او سی) نا کنڈ آن و یونین نا پرنسپل نمائندہ و پی ٹی ایم یورپ کمیٹی برائے جہانی سفارتکاری و امور خارجہ نا بھلّا فضل الرحمن آفریدی نا بھلُنی ٹی دا مجلس اڈ تنّنگا۔
ڈاکٹر نسیم بلوچ سی پیک نا وڑئٹ پاکستان تون چین ئنا شریکی نا خطرہ آتا ہیت کرے۔
او آبنائے ہرمز آن خُڑک گْوادر نا تزویراتی اہمیت آ زور شاغسہ پارے کہ چین نہ بیرہ معاشی زورآوری خواہیک بلکہ دا دریابی کسر آ ہم کوزہ کننگ خواہیک۔ گوادر نا دامون ہیمون واڑ خلنگ نا مسخت بیرہ بلوچ اُلس ئے توننگ نہ بلکہ جہانی تاغت آتیک اہمو خطہ ئسے آ چین ئنا تینے سوگو کننگ نا پھاشی سے۔
او بلوچستان ئٹی چین ئنا دُو آن مروکا بندغی حق آتا لتاڑ تیا پارے کہ سی پیک ہرادے گیشتر شون ئنا پِن تننگک، خطہ نا مال و مڈی گیس، خیسُن پیہن تا لُٹ ءَ پُل ئے ودّفینے۔ ہندن گوادر بندرگاہ آن بارنگا ڈٹ تیان بھلو مخلوق ئس بےاُرا کنّنگانے۔ سی پیک بلوچ آتیکن شون ئس اف بلکہ اوفتہ پدی بِٹنگ نا چم ئسے۔
بلوچ آتیکن دودی وڑئٹ شرف تخوکا شار گوادر ئے فوجی علاقہ ٹی بدل کننگ ہم چیئرمین نسیم بلوچ نا تران ئنا بشخ ئس، او افسوس کرسہ پارے کہ جہی آ مخلوق داسا فوجی تا موکل آن ویتہ تینا شار ئٹی پیہنگ کروف، انتئے کہ دا علاقہ چین ئنا بھلا زمینی و سیاسی ڈٹ تا رد ئٹ اسہ فوجی جہہ ئس جوڑ مسّنے۔
او زوراکی نا بیگواہی تیا ہیت کرسہ ہمو دڑد آتا پارے ہرا اسہ زوراکی ئٹ بیگواہ کننگوکو بندغ ئس و اونا خاہوت آ مریرہ۔ او پارے کہ بلوچ راج ئنا آجوئی نا جوزہ ئے شیف شاغنگ و مخلوق ئے خُلیفنگ کن پاکستان نا نیمہ آن زوراکی نا بیگواہی تہ برجاء تخنگانے۔ ہراٹی بےقانودی خلّنگ و لَٹ کُٹ کننگ ہم اریر۔ بلوچستان آ زور ئٹ کوزہ آن پد 1948 آن بلوچ اُلس دا زوراکی تا گْواچی ءِ۔
پاکستان ٹی ایلو بیوس آ راج آتا برخلاف بندغی حق آتا لتاڑینگ آ او پارے کہ ہزار آ بلوچ، پشتون، سندھی و کشمیری تہ ویتہ مقدمہ آن بندی کننگانے۔ دا مرکز آک بےانصافی نا ‘بلیک ہول’ ءُ ہراڑے بندی تہ سخت لَٹ کُٹ کننگک، و اوفتان بھاز آک ولدا پھاش کننگپسہ۔
تینا گُڈیکو لوزاتیٹ او جہانی مخلوق آ زور شاغا کہ او تینا چُپی ئے پرغر۔ بلوچستان ئٹی مروکا بندغی حق آتا لتاڑ زو ئس جہانی توار نا خواست ئے کیک۔ پاکستان آن اونا کروکا زوراکی تا ورندی ہلّنگہ، بندغی حق آتا لتاڑ آ آزاتی ئٹ پٹ ءَ پول مروئی ءِ و اسہ رنگ برخلافی آ پاکستان آ رکھ خلّنگہ۔
او سخت آ لوزاتیٹ ولدا پارے کہ ” دا ننا بقاء نا جنگ ءِ، جہانی مخلوق بلوچ اُلس ئنا واک و آجوئی نا جہد ئٹی اوڑتو اوار سلِہ۔
