بلوچ پولکار ڈاکٹر نصیر دشتی جنیوا ٹی بلوچ راجی زْرمبشت (بی این ایم) نا پنچمیکو بلوچستان جہانی دیوان ئٹی پاکستان نا شیف آ بلوچ راج و اونا ویل و جہد آ تران کرے۔
او پارے کہ پاکستان راجی آجوئی نا جہد ئٹی ہمو ریاست ءِ ہرا گمان ئسے نا بنیات آ ڈنّ ئنا بروکا کوزہ گیر آن آجو مس ولے اونا فکر اونا تینا ڈغار آن اف بلکہ لندن ئٹی جوڑ کننگا۔ پاکستان ہرا زبان ئے تینا راجی زبان پائک او پاکستان نا حد ئٹی رہینگوکو اسہ بندغ ئس یا راج ئسے نا زبان اف۔
ڈاکٹر نصیر دشتی پارے کہ پاکستانی زانت کار و خواننگ جاہ تا نصاب نا رد ئٹ پاکستان اللہ نا کُنڈ آن اسہ ٹھیکی اسے، دا وڑ نا عقیدہ دنیا نا پین ریاست ئسے ٹی اف۔” دا ہندنو ریاست اسے ہرا نا بارث ئٹ گمان ءِ کہ دادے خدا تینٹ آجو کرفیسس۔ و پدا اونا ساڑی آ علاقہ آک پنجاپ، سندھ، پختونخوا یا بلوچستان، ہچّو آجوئی نا جہد ئس متو۔ دا اللہ نا تروکو ریاست ئس اس، ہرادے انگریز آک جوڑار و داسا دا تینٹ ننے آ کوزہ کننگ ئٹی ءِ، ہراڑان نہ بیرہ بلوچ آتہ بلکہ سُہیل ایشیائی ہر بندغ سزا کُننگ ئٹی ءِ۔”
تینا تران ئٹی او چنگیز خان نا بخارا ئے کھٹنگ نا کسّہ ئے بنفے، ہراڑان مذہبی راہشونک رحم خْواہار، اللہ نا زور ئے توار کریر کہ اگہ چنگیز تینا خلّنگ آتہ برجا تخا تو اوڑا عذاب دھڑنگو۔ ولے چنگیز خان اوفتا خواست آتہ منّتو و پارے کہ دا وخت آ او اللہ نا منشا نا پھاشی ءِ۔ ڈاکٹر نصیر دشتی نا پاننگ اس کہ دا تاریخی حوالہ نا رِدئٹ پاکستانی حاکم آک بلوچستان نا ویل آتہ ہنوکا جنگ کروکا تا تباہی تون ملّفینُہ۔ بخارا ٹی منگول آتیان بار، پاکستان نا زوراکی ننے آ، پشتون، سندھی و مچّا سُہیل ایشیائی خطہ کن نالت اسے۔ خطہ نا مخلوق کن ہندنا ویل آتا سوَب ءِ ہرافتا ہچّو بدل اف۔
بلوچستان نا اِرا بھلو ویل ئنا زیہا ہیت کرسہ ڈاکٹر نصیر دشتی پارے کہ اوفتان اسٹ امن ئٹ جہد کروکاتہ خلّنگ و ایلو گْوادر ئے واڑ کنّنگ ءِ۔
پاکستانی ریاست امن ئٹ جہد کروکاتہ "فورتھ شیڈول” ئٹی شاغسہ اوفتیک دہشت گردی نا پِن آن کاریم ہلّنگ ئٹی ءِ۔ ننا ورناک ہرا مال و مڈّی تا لُٹ و پُل و بیگواہی تا برخلاف امن ئٹ جہد کیرہ۔ داسا اوفتہ دہشت گرد
پاننگ ئٹی ءُ دا چم ئٹ ریاست اوفتا جہد ئے نزور کننگ خواہیک۔ ہراتم فوج خْواہے تو اوفتہ بےقانودی ئٹ خَلیک بٹک۔
او پارے کہ داڑان بلوچ ورنا تا زند خطرہ ٹی تمّک۔ ریاست ہلّنگ کیک، بےقانودی خلّنگ کیک و پدا دا پاننگ کیک کہ او اندرو حوال ئسے نا بنیات آ "دہشت گرد” آتہ خَلکنے۔ اونا پاننگ اس کہ داڑان خطہ ٹی ظلم و زوراکی ٹی ودّیکی برو۔
ارٹمیکو بھلا معاملہ ہراڑا او ہیت کرے او گْوادر ئے واڑ کنّنگ نا ءِ۔ دا ڈٹ کن چین تینا "بیلٹ اینڈ روڈ انیشیٹو” نا بشخ ئنا وڑئٹ زر تننگ ئٹی ءِ۔ پاکستانی ریاست چین ئنا کمک ئٹ جہانی بالی جاہ و ہیب ءَ کھیب تون اوار مچا گْوادر شار ئے واڑ کننگ خْواہیک۔ دا واڑ بیرہ مادی بنیات آ نہ بلکہ دا بلوچستان ئٹی چینی انکلیو (چین ئنا دُو ٹی مچا علاقہ) نا ڈس اسے۔ دا اسہ کوزہ گیری ڈٹ اسے، اسہ ہندنو علاقہ ئس جوڑینگ خْواہیرہ ہرا سِدھا چینی ‘پیپلز لبریشن آرمی’ نا حوالہ مرے۔
او پارے کہ دا شون بلوچ راج ئنا چاگڑدی، کاروباری و سیاسی معاملہ آتا زیم شاغوکو سوَب ئسے۔ دا ‘انکلیو’ دنیا ٹی ننا پارہ آ اولیکو اشتراکی کالونی نا پھاشی ءِ۔ ہرا بلوچستان آن تیبہ یکّہ ءِ و پیشن نا تا دُو ٹی ءِ۔ دا نا زیم آک ننا مخلوق کن بھلو نسخان مرور۔
او تینا تران ئنا ایسری ئٹی غُٹ بلوچ سیاسی تنظیم و جہدکار آتا زور شاغا کہ خطرہ آتہ سرپند مروئی ءِ۔ دا تدینی تا ننا چاگڑدی، کاروباری و سیاسی ندارہ آ تمّوکا زیم آک بھلو وخت ئس چِھکور۔ داسا وخت بسّنے کہ نن ہُرے کپّن و دا زوراکی تا برخلاف بش مرین۔
