آواران نا علاقہ جھاؤ آن درو پاکستانی فوج درمان بلوچ پنیئو اسہ ورنا ئس زوراکی ئٹ بیگواہ کریسس، ہرا نا اینو جون خننگانے۔
حوال تا رد ئٹ رحیم بخش نا مار درمان بلوچ جھاؤ نا خلق چھبی نا جہی ئس ءِ ہرادے درو ویگہ نا کوھڑو ٹی پاکستانی فوج ئنا کیمپ آ پیشی کن خواہفنگاسس۔ کیمپ آن واپس اُرا غا بننگ نا وخت آ کیمپ ئنا خُڑک آ پاکستانی ایجنسی تا بندغ آک اودے زوراکی ئٹ بیگواہ کریسُر۔
پن کروک ورنا ئے پاکستانی فوج کھسفِسہ اونا جون ئے خسانے۔ جون اینو سہب ئنا کوھڑو ٹی ڈغار تیٹ خننگانے۔
درمان بلوچ نا زور بیگواہی نا حوال زرمبش نا کنڈ آن شنگ کننگاسس۔
خیال ئٹ مرے جھاؤ ٹی دا اسہ ہفتہ ٹی پاکستانی لشکر نا دو آن بیگواہی آن گڈ جون تا خننگ نا دا ارٹمیوکو تدینی ءِ۔ ہفتہ ئس مُست پاکستانی فوج جھاؤ ٹوبوکڈ ئٹ حنیف بلوچ ء عزیز پنیئو بندغ ئس زوراکی ئٹ بیگواہ کریسس و ہمو دے آ اونا جون ئے خساسس۔
بیرہ آوار نا علاقہ ٹی ہنوکا دہ دے ئٹی نُہہ بندغ پاکستانی فوج کھسفینے ہرافتیٹ اسہ نیاڑی ئس ہم اوار ءِ، و اسہ نیاڑی ئس ٹپی ہم مسنے۔
