بلوچ مُہبر رحیم بلوچ ایڈووکیٹ چاگڑدی حوالکاری تلہ ایکس آ بیان ئس شنگ کرسا پارے کہ پاکستانی لشکر نا دو آن بلوچستان نا پنی آ صحافی لالہ لطیف بلوچ نا خون ئنا بننگ تو کنا است مونجھا مس و بے قراری کنے تینا پلویڑ ئٹی ہلک۔ خیال ئٹ مرے کہ ہندا سال مارچ ئنا تو ئٹی پاکستانی لشکر لالا لطیف نا مار و ایلم نا مار ئے ہم مشکے ٹی اوفتا اُرا غان بیگواہ کننگ آن پد اوفتا جشوک جون تِہ خساسک۔ گدرینگوکا منہ دہک آن کوزہ کننگوک بلوچستان ئٹی پاکستانی ریاستی دہشتگردی ٹی ہرا ترندی بسنے و داٹی دے پہ دے آن ہخس ترندی بننگ ئٹی ءِ ہرانا سوب آن لشکر کشی، زوراکی نا بیگواہی، جشوک آ جونک، ٹارگٹ کلنگ، اشتماعی قبر آتا خننگ مننگ و بلوچستان نا مڈی تا نیلامی نا اشتہار و بولی تے آن بیدس ایلو خبر آک بھاز کم خننگ ئٹی بننگ ءُ و بِننگ ئٹی بریرہ۔
او پارے کہ شہید لالا صمد ئے 1990 آن چاوہ ہراتم بی ایس او نا بنجاہی وائس چیئرمین اسُٹ تو لالا لطیف بی ایس او مشکے زون ئنا کماش اسک۔
اونا پاننگ اس کہ خواننگ و خوانندہ سیاست آن فارغ مننگ آن پد ای وکالت نا شعبہ ٹی ہناٹ، داڑ تو اوار اوار سیاست نا پت آن پر انگا کسر ئے ہم برجاء تخاٹ، ہندن لالا جان صحافت نا کسر آ سر ہلک۔ ہرا کوزہ کننگوک بلوچستان نا وڑ انگا جنگ زدہ غا خطہ ٹی "دیر و خاخر” ئٹی جُھپ کننگ آن کم افک۔ 1990 نا دہک نا اخیر و دا کرن (صدی) ئنا بناء ٹی پارٹی نا تنظیمی مُچی تیٹی اواری کم بھازیکا مشکے آ ہِنوئی مسکہ، ہراڑے لالا جان تو اوڑدئی مسکہ۔ او وخت مشکے ٹی انتخاب اخبار تون اوار اخبار آتا بھازیکا نمائندہ و نامہ نگار لالا جان مسکہ۔ بھاز زندہ دل، مخوک، سوہو و نِج ءُ وطن دوست بلوچ ئس اسک۔
رحیم بلوچ پارے کہ کنے یاد ءِ لالا لطیف جان تون دہ و نیم دہک ئس مُست اوڑدئی مسک تو او منڈ اسک ولے او وخت آ پاکستانی لشکر و ڈھکوک ادارہ آتیکن ہمرو ہم بلوچ ئسے کھسفنگ یا زندان کننگ کن سَن، جنس، جانجوڑی نا حالیت و شعبہ ہچو معنی ئس تختوکہ۔ کسے نا بلوچ و با شعور مننگ اودے اونا لخ ئے خلنگ کن کافی ءِ۔ کوزہ کروک ریاست پہہ مریک کہ ریاستی دہشتگردی و بلوچ زنک کشی نا ذریعت ئٹ او بلوچ راجی جنز ئنا مون ئے توننگ کیک۔ دہن بیرہ پاکستان سمجھپک بلکن دیہاڑ شاہد ءِ کہ ہر کوزہ کروک و استعمار نا سوچ ہندا مسنے و پدا بےسوب مننگ و جہان نا نشخ آن ڈِھرنگ ہم اوفتا بخت مسنے۔
او ایسر ئٹ پارے کہ ای شہید لالا لطیف جان نا خاہوت نا ڈکھ ئٹی بریبر اوار اُٹ و دعا کیوہ کہ اللہ تعالی اودے جنت ئٹی بڑزو ہند ئس بشخے و اونا خاہوت ئے دا ڈکھ ئے سگھنگ نا سگ ایتِہ۔ آمین
