بلوچ بندغی حق آتا راہشون و وائس فار بلوچ مسنگ پرسنز نا وائس چیئرمین ماما قدیر بلوچ نا حالیت بھاز خراب مسنے۔ ہراکان پد اودے آئی سی یو ٹی دننگانے۔
پاننگک کہ اونا حالیت بھاز خراب ءِ و ڈاکٹرک اودے آکسیجن آ تخانو۔
داکان مالو 16 مئی 2025 ئٹی ماما قدیر بلوچ نا تب خراب مننگ نا سوب آن اودے اسپتال آ دننگاسس۔ ہموتم وائس فار بلوچ مسنگ پرسنز نا آفیشل فیس بک پیج آ اسہ ویڈیو ئس شنگ کننگاسس۔ ہراٹی ماما قدیر ئے اسپتال نا پلنگ آ آکسیجن ماسک تون اوار خننگ مسکہ۔ اونا حالیت ہموتم آن خراب ءِ و داسہ او آئی سی یو ٹی تیبہ جانجوڑی نگرانی ٹی تخنگانے۔
ماما قدیر بلوچ ہنوکا اسہ کرن آن زیات وخت آن بیگواہ کننگوک بندغ آتا آجوئی کن برانز کننگ ءِ۔ اونا بھلنی ٹی کوئٹہ پریس کلب نا مون آ ہڑدے بین برانز برجاء اس، ہراٹی او سہب ئنا دہ بجہ غان شام ئنا 6 اسکان بین برانز آ توسکہ۔ اونا اسہ وڑ جسمانی خواری، بھلن سَن و ڈکھ اونا جانجوڑی آ بھلو زہم شاغانے۔
ماما قدیر نہ بیرہ اسہ جیرتی ءُ سیاسی راہشون ئس ءِ بلکن او تینا مار جلیل ریکی بلوچ نا زورانسری بیگواہی و دزگیری آن گڈ خون ئنا ڈکھ ئے ہم است ئٹ تخوک بیوس آتیکن توار بڑز کرسہ کرینے۔ او بلوچ راجی تحریک ئٹی اسہ چیدہ ئسے نا حیثیت تخِک و تیبہ جہاں ئٹ بندغی حق آتا ہیت ئے کروک ئسے نا رد ئٹ چاننگ مریک۔
اونا ناجوڑی آ بندغی حق آتا حلقہ، باسک، بلوچ راج دوست و ایلو ہمدڑدی تخوکا تیٹ فریشانی ودی مسنے۔ کل بندغ آ تیان اپیل کننگانے کہ ماما قدیر بلوچ نا زوت جانجوڑی کن دعا کیر۔
