حوال تا رد ئٹ حب لاسی کسر آ مسلم اسکول نا امتحانی مرکز آ پولیس چھاپہ نا وخت بی وائی سی نا باسک ماہ زیب ئے دزگیر کننگ نا کوشست کرے۔
خنوک آتا پاننگ ءِ کہ پولیس و سادہ پُچ آتیٹی کارندہ غاک امتحانی مرکز ئے گھیرہ کریر و ماہ زیب ئے دزگیر کننگ نا کوشست کریر، واہم خوانندہ و استاد آتا کمک ئٹ او پیشتما۔ انتظامیہ ئے پاننگا کہ ماہ زیب نا برخلاف دفعہ 3 ایم پی او نا رد ئٹ مقدمہ نوشتہ کننگانے و اونا دزگیری کن کاروائی مننگ ءِ۔
خیال ئٹ مرگ ماہ زیب زوراکی ئٹ بیگواہ کننگوک سیاسی باسک راشد حسین نا ایلم نا مسڑ ءِ اونا آجوئی کن کراچی و حب ئٹی بی وائی سی نا بھلنی ٹی مروکا برانز آتیٹی سرگرم ءِ۔ داکان مُست اودے کیہی وار دزگیر کننگانے۔ ماہ زیب نا رد ئٹ دزگیری تا وخت اودے دڑکو تننگانے کہ اگہ او بی وائی سی نا تلہ غان کاریم کرے اودے ٹِک کننگو و ایف بی آر نا پارہ غان ٹیکس نوٹس ہم اودے تننگ مسُنے۔
ماہ زیب نا رد ئٹ اونا سن دائسکان ہژدہ سال متنے و نہ اود ٹیکس ریونیو ٹی رجسٹر مسُنے نئے اونا راہا داخس جائیداد ارے کہ او ٹیکس ایتِہ۔ ایسر ئٹ پارے کہ ننا خواست آک قانود نا رد ئٹ ءُ و پُر ایمن برانز ننا حق ءِ و تینا زوراکی ئٹ بیگواہ کننگوک آ بندغ آتیکن اندا حق ئے کارمرز کننگ اُن۔
