بلوچستان نا ضلع کیچ ئنا بنجائی شار تربت نا علاقہ جوسک ئٹ سلاہ بند بندغ آک پولیس اسٹیشن آ جلہو کرسا کوزہ کریر، پولیس کارندہ تا سلاہ تے دوئی مسُر و ماڑی ئے ہُشار۔
جہی حوال تا رد ئٹ تدینی پنچ بجہ نا وخت آ مسنے و سلاہ بند بندغ آک منظم منصوبہ ئٹ پولیس اسٹیشن ئٹ پیہانو۔
حوال تروکا پاریر کہ جلہوکارک سلاہ تے دوئی مننگ آن پد تھانہ ئے تیبہ خاخر تسنو۔
دائسکان تدینی نا ذمہ واری ئے کس ئس ہرفتنے۔ نئے کہ ضلعی انتظامیہ یا پولیس نا کنڈ آن دائسکان دا تدینی نا رد ئٹ باضابطہ بیان شنگ کننگانے۔
ایلو کنڈ آن ضلع چاغی آن حوال رسینگانے کہ دالبندین ئٹ پولیس ڈھکوک حوال ئسے نا بنداو آ اسہ اُرا ئسے آ چھاپہ خلکنے و چھاپہ نا وخت آ تومکا کنڈ آن سخت سمکاری مسنے۔
سمکاری ٹی اسہ پولیس کارندہ ئس ہند آ مرگ ئنا گواچی مسنے و ڈی ایس پی تون اوار اسہ سپاہی ئس ٹپی مسنے۔
ایس پی چاغی نا پاننگ نا رد ئٹ پولیس نا جوابی سمکاری آن اسہ جلہوکار ئس کھسکنے و اسٹ ٹپی مسنے۔
ٹپی مروکا تے دالبندین نا پرنس فہد اسپتال آ رادہ کننگانے و ڈی ایس پی و ایلو ٹپی مروکا تے جانجوڑی کمک آن پد کوئٹہ غا رادہ کننگانے۔
پولیس علاقہ ئے گھیرہ کننگ آن پد ودیک پٹ ئہ پول بناء کرینے و تدینی نا نوعیت و جلہوکار تا چاہنداری نا رد ئٹ ہچو شابیت حوال مونا بتنے۔
