بلوچ لبریشن آرمی نا جارکش جیئند بلوچ پارے کہ سرمچارک قلات نا علاقہ منگچر ئٹی کاروائی نا وخت آ دزگیر کننگوک پولیس کارندہ تے آجو کننگانے۔
او پارے کہ اے ایس آئی غلام سرور، فراز علی، رفیق احمد چنہ، محمد ناصر و فراز احمد ئے بی ایل اے نا دستہ ” فتح اسکواڈ” ہموتم دزگیر کریسس، ہراتم منگچر نا اسٹریٹجک اہمیت نا جہہ خزینئی آ بنجائی کسر آ ناکہ بندی نا زریعت ئٹ شار نا کنٹرول دوئی کننگا۔
جارکش پارے کہ بی ایل اے دا پھاش کننگ خواہک کہ دا آجوئی نزوری یا سمجھوتہ نا علامت اف، بلکن بلوچ راجی مزاحمت نا اخلاقی بھلنی، سیاسی پختگی و حکمت عملی تا مظہر ءِ۔ نن دا کارندہ تے اسہ وارخواہی ئس تسونن کہ او تینے بلوچ راجی تحریک نا برخلاف جنگی صف آن یکہ کیر۔ و دا درست کیر کہ او اسہ کوزہ گیر لشکری نظام ئسے نا بشخ مرسہ تینا ہی بندغ آتا خلنگ ٹی اوار ءُ۔
جیئند بلوچ ودیک پارے کہ نن چانہ کے بھاز آ بلوچ وردی ٹی مننگ نا باوجود نو آبادیاتی جبر ئنا برخلاف نفرت تخیرہ، ولے نی تینا توفک ئے دژمن نا صف تیٹ تخیسہ۔ گڑا نا تینا پجار بلوچ اف، بلکن کوزہ گیر وردی و اونا مفاد آتا برجائی مریک۔
او پارے کہ اینو نا دا آجوئی اسہ در ئسے ہرادے نن یلہ ایلانن، اسہ موقع ئسے ہرادے نن تسونن۔ ولے اگہ پولیس آک تینا اندا روش ئے برجاء تخار، گڑا نن نمے امو نظر ئٹ ہرون ہرا نظر ئت دژمن ئے ہرینہ، و نتائج آک ہم امو رد ئٹ مرور۔
جارکش ایسر ئٹ پارے کہ نن خواہینہ کے دا کلہو بلوچستان نا ہر تھانہ، ہر چیک پوسٹ و ہر وردی والا بلوچ اسکان سر مرے کہ بلوچ لبریشن آرمی نمے سم ئنا گواچی کننگ خواہیپک، ولے نمے دا فیصلہ کروئی مروئے کہ نم دژمن نا توفک نا بشخ مرورے یا بلوچ راج ئنا بقاء کن جنگ ئٹ غیر جانب دار مرورے۔
