ڈاکٹر ماہ رنگ بلوچ، شاہ جی صبغت اللہ، بیبرگ بلوچ، بیبو بلوچ و گلزادی بلوچ ہرا بلوچ یکجہتی کمیٹی نا بنجائی سروک و باسک آک ءُ دا وختا 3 ایم پی او نا رد ئٹ کوئٹہ نا ہدہ جیل ئٹ بند ءُ و درو آن بین برانز کننگ ءُ۔
دا بین برانز ریاستی ادارہ آتا کنڈ آن برجاء بیدادی، بیدس آئین دزگیری و بندغی حق آتا پھاش لتاڑ نا برخلاف علامتی مزاحمت ئس ءِ۔
بی وائی سی نا بیان نا رد ئٹ جیل ئٹ اوفتے سخت ذہنی و جسمانی بیدادی تا گواچی کننگانے۔ اوفتے سی ٹی ڈی نا کارندہ غاک و زالبول پولیس افسر زرغونہ ترین نا نگرانی ٹی بیدادی نا گواچی کننگانے و اوفتے دزگیر ئٹ کھسفنگ نا دڑکو ہم تننگانے۔
ماہ رنگ بلوچ، بیبو بلوچ و گلزادی بلوچ نا وکیل و خاہوت آتا رد ئٹ اوفتا بدن آ پھاش بیدادی نا نشان آک اریر۔ بیبرگ بلوچ و شاہ جی صبغت اللہ آ ہم ریاستی ادارہ آتا کنڈ آن اسہ وڑ دباؤ و بےبندغی روشت برجاء ءِ۔
تنظیم نا کنڈ آن پاننگانے کہ ننا سروک آتا جانجواری یا ساہ ئے نسخان مس تو دا نا تیبہ ذمہ واری ریاست پاکستان، جیل کوالخواہ و بلوچستان نا انتظامیہ نا مرو۔
