درناز رحیم
ہراتم قومی تحریک آک ہمو سند آ سر مریرہ کہ ہراڑے او ظالم، جابر، سامراج و کوزہ گیر ریاست نا روتہ غا تیٹ دو شاغنگ و اونا وجود ئے چیلنج کننگ ئٹ سرسہب مریرہ گُڑا سامراج و کوزہ گیر ریاست آک ہم تینا نہاری آ دروشم ئٹ بریسہ تینا رکھنگ نا بے سہب و گُڈیکو کوشست ئے کیرہ۔۔۔۔ ہئو۔۔۔ بے سہب کوشست۔۔۔ انتئے کہ دیہاڑ دا ہیت ئنا شاہدی ایتک کہ اسہ راج ئسے نا رضا آن چَپ، زوراکی ئٹ، ظلم ئٹ و تادی ئٹ ہچو زوراک ئس ہچو کوزہ گیر ئس تینے اُرے اسکان رکھنگ کتنے۔
اینو نا برجاء غا تحریک پوسکنو و ناگمان آ ودی مروکو تحریک ئس اف، بلکہ دا مزاحمت نا ہمو چرجوئی ءِ ہرا 27 مارچ 1948 آ بلوچستان آ پاکستان نا زور ئنا کوزہ غان گُڈ بناء مس۔ ہمو وخت آن بلوچ نا مزاحمتی تحریک آک بش مریسا کرینو چائے او آغا کریم، بابو نوروز، ہفتاد نا دہک ئٹ بناء کننگوک راجی کماش آتا تحریک مرے۔ ولے اینو نا ہرا برجاء غا تحریک ءِ دا غُٹ آن سوگو و منظم تحریک سرپند مننگک۔ داٹی بلوچ نہ بیرہ سلاہ بند پڑ آ بلکہ سیاسی پڑ آ ہم متحرک و منظم ءِ۔ دا تحریک ئٹ بلوچ نا نیاڑیک ہم ہڑتمو پڑ آ اسہ بنداوی کڑد ئس سر تننگ ءُ۔ اندا سوب ءِ کہ کوزہ گیر اینو تینا ایسر ئے خُڑک خنِسہ تینا زوراکی، بیدادی و تادی تِہ ہم ودفنگ ءِ۔
اینو ہزار آ بلوچ نرینہ، نیاڑی، چُنا و پیر و کماش آتا زندان تیٹ بندی مننگ دا ہیت ئنا پاش شاہدی ءِ کہ ریاست نا گُڈیکو ساہ ءِ، او تینا بچفنگ کن گُڈیکو وار نت و دو خلنگ ءِ۔ بلوچ نیاڑی تا راہشونی ٹی برجاء بلوچ نا سیاسی و پُرامن جہد ریاست ئے انداخس بیم و خُلیس نا گواچی کرینے کہ اینو او بلوچ نا چُنا نیاڑی تیا دو شاغنگ ءِ، اوفتے ہم ہمو وڑ زندان تا گواچی کننگ ءِ و بندی کننگ ءِ امر کہ او تدوکا وخت ئٹ نرینہ غا تے زندان تا گواچی کریکہ و اینو ہم کننگ ءِ۔
او کہ زندان تا گواچی ءُ او تو مزاحمت نا شمبلاخ آن ودی مروکا روشنائیک ءُ، ہمو روشنائیک ہرا تہار آ کوٹی تیٹ ہم نزور تمپسہ، بلکہ تینا روشنائی ئٹ مزاحمت نا کلہو ایترہ، ہمو مزاحمت ہرا ظالم، جابر و کوزہ گیر نا گُٹ ئٹ لوپ مریک و اودے چُھٹفک۔
دا ہیت دے آنبار روشن ءِ کہ بلوچ تینا مزل آن اخس خُڑک مس اودے کوزہ گیر نا کنڈ آن ہموخس زوراکی تتون مون تروئی تمو، و نن خننگ اُن کہ ریاست نا زوراکی تیٹ اخس کچ اسکان ودکی مننگ ءِ۔ اینو بلوچ قوم نا نیاڑیک ہم زندانی ءُ و ہمو زندان تا در و دیوال آک دا شاہدی تننگ ءُ کہ سہب ننا زندانی آ گودی تا ءِ، سہب ننا زندانی آ خواجہ غا تا ءِ، سہب ننا سنگر ہلوک لشکر نا ءِ، و سہب بلوچ راج ئنا ءِ۔
