بلوچ نیشنل موومنٹ (بی این ایم) نا مسکوہی چیئرمین خلیل بلوچ پارینے کہ شال ئٹی برجاء تولوک برانز آ جلہو، اُلس ئے خلنگ و بی وائی سی نا راہشون ڈاکٹر ماہ رنگ بلوچ تون اوار ایلو برانزی تا زوراکی نا بیگواہی دا راستی ئے پھاش کیک کہ پاکستان اسہ کوزہ گیر و سامراجی ریاست ئس ءِ، ہندن بلوچستان اسہ کوزہ مروکو وطن ئس ءِ۔ بلوچستان کوزہ کروک تو ارے ولے باء تروک اف، اینو ہم دا پِتی آ پِڑ آ حق و ناحق نا جنگ برجا ءِ۔
اونا پارے کہ پاکستانی ریاست بلوچ راج ئنا برخلاف نسلی و سیاسی وڑئٹ پٹ ئہ سٹ کننگ ئٹی لگانے۔ ڈاکٹر ماہ رنگ بلوچ اسہ چائندار، خوانندہ و دلیل ئٹ ہیت ئے تینا مونا تخوکو توار ئس ءِ، اودے ایلو مخلوق تون اوار زورئٹ بیگواہ کرسہ ریاست دا ہیت ئے پک کرے کہ بلوچ راجی فکر و جہد ریاست نا بنیات ئے سرفینہ۔ داسا حالت ہندا مسنے کہ ریاست بلوچ چنا نیاڑی تہ ہم زورئٹ بیگواہ کننگ ئٹی ءِ، ہرا دا ریاست نا باء تننگ نا درشانی ءِ۔
چیئرمین خلیل بلوچ ودیک پارے کہ پاکستانی ریاست نا دا چم کہ ہر سمائی آ بلوچ ئے یا تو چُپ کرفبو یا چھٹفبو، داسا ہچو شک ئس سلتنے۔ بلوچستان ئٹی پاکستانی لشکر، جہد ئنا ہر وڑ ئے بوٹ و زوراکی ئٹ ایسر کننگ خواہک۔ دا عمل داسا اسہ پوسکنو و پین دِتریئو دور ئسیٹ بننگ ئٹی ءِ، نن دا زوراکی آ نہ بیرہ افسوس کینہ بلکہ دنیا ئے پاننگ خواہنہ کہ بلوچ راجی شہید آتا دتر، بندی تا فکر و بیگواہ تا قربانی و چُپ انگا جہد ئنا بھرم راجی آجوئی ءِ۔ اینو نن ہنوکا وخت ئنا حساب آ گیشتر اوار، باخبر و زیات حوصلہ تخنہ، بلوچ راجی جہد تینا منزل نا وڑ ئہ ڈول ئٹ برجا ءِ۔
