زرمبش براہوئی
تومکا بُھٹ ئسے نا ٹُھل آ تولوک اسر، سارنگ مُر دیچا انتس ہُننگ اس و مہرو تینا دو ئنا بائینک آ تتون گوازی کننگ اس۔ دامون ہیمون تالان چُپی ئے پرغِسہ اونا بائینک آتا شڑنگ شڑنگ اس۔ و اونا بائینک آتا ساز ئنا توار ئٹ سارنگ نا است ئنا درکہ غا تا رقص اس۔
“نی واپس اراتم بروس؟ “ مہرو ناگمان آ سارنگ آن سوج کرے۔
“سما اف” سارنگ بیدس تاثر آن پارے۔
“سہی۔۔۔ تو دا پار کہ نی واپس تو بروس نہ؟” مہرو سوبری ئٹ سوج کرے۔
“سما اف۔”او ہموہن بے تاثر لہجہ ئٹ پارے۔
“اگہ نی واپس بتوس گُڑا ؟” مہرو وا سوبری ئٹ سوج کرے۔
“ سما اف۔” اونا لہجہ ٹی زرس خرینی ودی مس۔
“خیر۔۔۔ دا تو پاننگ کیسہ کہ نا ہِننگ آن گڈ کنے خوش مروئی ءِ یا فریشان؟ “ مہرو دڑد آن پُھر بشخندہ ئس کرسا اوڑا ہُرا۔
“ہچ خبر اف۔” سارنگ ہم اودے ہُرا ولے اندن کہ اونا خنک ہر وڑ ئنا احساس آن خالی و بے تاثر اسر۔
“ تو نے ہنت کہ سما ارے ہمو ہیت ئے پار۔” او ہمو وڑ بشخندہ ئٹ سوج کرے۔
سارنگ دا ہیت آ زور ئٹ جوڑ تیا بشخندہ ئس ہتسہ پارے، “ کنے بس اندا سما ءِ کہ کنے تینا ذمہ واری تِہ پورو کروئی ءِ، ڈیہہ ئنا حق ئے ادا کروئی ءِ۔۔۔ ای داخس وخت شار ئٹ کاریم کریٹ ولے داسا دن منکن اف۔ ای دشمن نا نظر ئٹ بسونٹ و کنے داسا مش تا دامون ئٹ سنگر ہلوئی ءِ، جھل و تلار تا باہوٹ مروئی ءِ۔ ای خواہوہ نی کنے دا کسر آ ہِننگ آن تورپہ۔ بلکہ کنے دا کسر آ ہرا تاغت بکار ءِ نی کنا ہمو تاغت مر۔ دن اف کہ ای نا جتائی ئے بھاز ارزانی ئٹ سگوٹ و کن کہ نے آن مُر مننگ ارزان مرو۔۔۔“ او مہرو نا خن تیٹ ہُرِسہ ہیت ئے برجاء تخا، “ولے مہرو۔۔۔ وطن نا حق۔۔۔” او دوارہ خن تہ شیف کرے و چُپ مس۔
“ وطن نا حق کنا حق آن زیات ءِ۔ وطن نا مہر کنا مہر آن زیات ءِ، وطن و کنے آن کس ئے ہرفوئی مس تو نی وطن ئے ہرفوس۔” مہرو اونا کھپی آ ہیت ئے برجاء تخسہ پارے۔
“ہئو۔” سارنگ اودے بیدس ہُننگ آن بیرہ انداخس پارے۔
“سہی ئے نی انت پاریس ای ہموہن کروٹ۔” مہرو نا جوڑ تیا بشخندہ دائسکان تالان اس۔
“ولے۔۔۔نا جند ئنا اُست انت پائک؟” سارنگ سوبری ئٹ سوج کرے۔
مہرو مہر آن پُھر اسہ کڑمبو نظر ئس اوڑا شاغِسہ پارے، “ کنا جند ئنا است پائک کہ نن کُل تینا تینا ذمہ واری تِہ پورو کین، ڈیہہ کن۔۔۔ راج کن۔۔۔ نی تینا و ای تینا۔۔۔ اگہ نن اسٹ ایلو تون اوار سلنگ کینہ تو سہی۔۔۔ نہ تو داخس کین کہ اسٹ ایلو نا نت تا بیڑی جوڑ مفن۔”
“ہئو۔۔۔ اندن ءِ۔۔۔ ننے اندن کروئی ءِ۔” سارنگ پدا مُر بے خننگوکو ٹک ئسے آ خن تِہ سخت کرسا پارے۔ و انداخس پارِسہ بش مس و مہرو ئے ہُننگ آن بیدس پارے، “رخصت اف۔” و پُچ آتِہ چھنڈِسہ راہی مس۔
مہرو اودے ہُرسہ اس۔۔۔ او اونا خن تیان مُر مرسہ اس و مہرو نا است نزور مرسا اس۔ مہرو تینا خڑینک آتِہ توننگ کتو و ڈغار آ ہُرسا پارے، “اوارن سنگت۔” و اونا خن تیان خڑینک آک گلزمین آ زرِسہ کریر۔
