کراچی آن خڑک بلوچستان نا صنعتی شار حب ئٹ، زوراکی ئٹ بیگواہ کننگوک بندغ آتا خاہوت آتا پر ایمن برانز آ پاکستانی لشکر نا سمکاری و زالبول تا دزگیری نا رد عمل ئٹ شار ئٹ کاروباری بنجاہک بند ءُ۔ شاریک پاکستانی لشکر نا پارہ غان زالبول و چنا تیا تاغت کارمرز کننگ آ غم و غصہ نا درشانی کرِسہ پاریر کہ اسہ کنڈا ریاست اوفتا بندغ آتِہ بیگواہ کیک ایلو کنڈا برانز کننگ نا حق ہم پھلنگانے، ہچو شاری یا زالبول ئس روچئی نا تو ئٹ شونق ئٹ دگ آ تیا تولِسہ برانز کپک بلکن ریاست اوفتہ دا حد اسکان بیوس کرینے۔
ایلو کنڈا بھوانی نا جہہ آ کراچی، کوئٹہ دگ آ زالبول تا برانز دائسکان برجاء ءِ، او پارینو کہ حب ئنا الس آن خواست کینہ کے او برانز ئٹ اوار مریر۔
خیال ئٹ مرے حب ئنا علاقہ بھوانی ٹی زوراکی ئٹ بیگواہ کننگوک بندغ آتا خاہوت آتیا اینو سہب ئنا پولیس و ڈھکوک ایجنسیک کریک ڈاوُن کرسا چنا نیاڑی تیا بیدادی کریر و سیما بلوچ، ماہ زیب بلوچ، ظفر گیشکوی نا پیر انگا لمہ تون اوار کیہی نیاڑی تہ دزگیر کرسا نادرستو جاگہ ئسے آ دریر و روڈ ئے ملنگ نا بے سوب کوشست کریر۔
برانز دوارہ فوزیہ بلوچ نا بھلنی ٹی بناء کننگا و روڈ بند کننگا۔ اندن خاہوت آتون اواری نا درشانی کن بلوچ یکجہتی کمیٹی لسبیلہ ریجن پولیس ادارہ غا تا کریک ڈاؤن نا برخلاف حب ئٹ شٹر ڈاؤن و پہیہ جام ہڑتال نا پڑو کرے و الس آن سیوتی نا درشانی نا خواست کرے۔
