بلوچستان نا علاقے پنجگور، کیچ و کوئٹہ آن پاکستانی لشکر ہفت بندغ دزگیر کننگ آن گڈ بیگواہ کرینے۔
بیگوای کننگوک بندغ آک محفوظ نا مار محمود، نعمان رفیق، راحیل علی، روشن علی، آدم غلام جان، نسیم بشیر و حافظ علی نا پن ئٹ درست مسنو۔
پن کروک بندغ آتیان محمود ئے پنجگور نا علاقہ عیسی آن دزگیر کرسا بیگواہ کننگانے۔
اندن تربت نا علاقہ بہمن ئٹی تدوکا کیہی دے آن لشکر کشی برجاء ءِ، و درے ننکان پاکستانی لشکر اُرا تیا چھاپہ خلِسہ نعمان رفیق، راحیل علی، روشن علی، آدم غلام جان، نسیم بشیر ئے دزگیر کرسا بیگواہ کرینے و اوفتا ہچ ڈس اف۔
ایلو کنڈ آن بلوچستان نا بنجائی شار کوئٹہ آن حوال رسینگانے کہ خاران نا جہی رہائشی حافظ علی ہرا تینا باوہ ئے کوئٹہ غا علاج کن دریسس، پاکستانی لشکر نا دو آن بیگواہ کننگانے۔
پن کروک بندغ ئے پاکستانی لشکر درے ننکان کوئٹہ ہوٹل آن دزگیر کریسس ہراکان گڈ اونا ہچ ڈس اف۔
خیال ئٹ مرے کہ حافظ علی نا ایلم مبارک ئے ہم درو پاکستانی لشکر خاران آن دزگیر کننگ آن گڈ بیگواہ کرینے۔
تومکا ایلم تا زوراکی نا بیگواہی تا برخلاف خاران ریڈ زون ئٹی خاہوت آک برانز کننگ ءُ۔
