بلوچستان نا دریابی شار گوادر ئٹ سلاہ بند بندغ آک پولیس و کسٹم نا کارندہ غا تیا جلہو کرسا سلاہ و مڈی تِہ پُھلار۔
شابیتی حوال تا رِد ئٹ کوسٹل ہائی وے نلینٹ زیرو پوائنٹ نا خُڑک آ کوسٹل ہائی وے پولیس و کسٹم پوسٹ آتیا نادُرست آ سلاہ بند بندغاک جلہو کرسا سرکاری گاڑی تِہ دریر۔
پُھلوکا مڈی تیٹ کسٹم و کوسٹل ہائی وے پولیس نا پسٹل، ایس ایم جی و گاڑیک ہم اوار ءُ۔
کوزہ گیر لشکر نا کارندہ غاک تدینی آن گڈ علاقہ ئے گھیرہ کرسا جلہو کروک آتِہ پٹنگ کِن سرچ آپریشن بناء کرے۔
یات مرے کہ تِدوکا دے تیٹی بلوچستان ئٹی دا وڑ ئنا تدینی تیٹ ودکی مسنے۔ ہنوکا تُو ئٹی کھچی، پنجگور و تربت ئٹی دا وڑ ئنا تدینی مونا بسنے۔
تربت و کھچی ٹی مروکا تدینی تا زمہ واری ئے بلوچ آجوئی دوست سلاہ بند تنظیم آک ہرفینو، دا وخت آ پنجگور و اینو گوادر ئٹی مروکا تدینی تا زمہ واری ئے کس ہرفتنے۔
