بلوچستان نا دریابی شار گوادر ئٹ درو ڈھوریہ اسکول نا مونا کتاب اسٹال خلنگ آ چھار بلوچ خوانندہ غاتِہ دزگیر کننگاسس ہرافتیا ایف آئی آر کننگانے۔
یاتی مرے کہ درو پولیس کتاب اسٹال آ جلہو کرسا خوانندہ و کتاب آتِہ تھانہ غا درے و پدا پولیس اوفتِہ آجو کرے ولے ڈکھکوک ادارہ غاک خوانندہ غاتِہ توریر و اوفتیان سر سوج کریر و اینو اوفتیا ایف آئی آر کننگانے۔
بساک خوانندہ آتیا ایف آئی آر کننگ نا مذمت کرسا پارے کہ شاید دا جہان نا اولیکو تدینی مرو ہراڑے کتاب اسٹال خلِسہ کتاب بہا کننگ و چائند تالان کننگ آ خوانندہ غا تیا ایف آئی آر کرسا جیل کننگِہ۔
او پاریر کہ دا ریاست و ریاستی قانودی نظام آ اسہ شاہمات ئسے ہرادے اخس شیف خلنگ مرے کم ءِ۔
بساک اینو گوادر ئٹی بلوچستان کتاب کاروان نا کتاب مُچی تیا پولیس نا جلہو و چھار خوانندہ کتاب آتون اوار دزگیر کرسا جیل ئٹی شاغنگ تون اوار بلوچستان نا ایلو ہند آتیا برجاء کتاب مُچی تیا پولیس نا پارہ غان ہڑاند شاغنگ نا برخلاف بلوچستان نا جتا شار تیٹ برانز کننگ نا پڑو کرینے۔
برانزی لڑ ئنا اولیکو بشخ ئٹ کوئٹہ، تربت، ڈی جی خان، نصیر آباد ئٹی برانز کننگو۔
