ضلع خضدار نا تحصیل زہری نا جتا ہند آتیٹی درو ننکان پاکستانی لشکر نا چھاپہ و کیہی بندغ آتا زوراکی ئٹ بیگواہی تا برخلاف زہری بازار ئٹی شٹرڈاؤن ہڑتال برجاء ءِ، داکان ویتہ انجیرہ کراس آ بھلا کسر ئے بند کننگانے۔
بھلا کسر آ برانز کروک آ زالبول تا بھلو کچ ئس ساڑی ءِ داکان بیدس حوال ءِ کہ سوراب کراس آ ہم سی پیک کسر ئے برانز کرسا بند کننگانے۔
برانزی تا پاننگ ءِ کہ پاکستانی لشکر خالد ولد عبدالصمد، شبیر ولد علی اکبر، زبیر ولد محمد اسحاق، فیض ولد علی اکبر، عمران ولد اکبر، بلال ولد علی، اکبر نادر ولد سرور، جہانزیب ولد عبدالخالق لوٹانی، فردین ولد کریم، فہد علی اکبر ئے دزگیر کرسا بیگواہ کرینے۔
برانزی تا پاننگ ءِ کہ کُل بیگواہ کننگوک بندغ آتا آجوئی اسکان برانز ئے برجاء تخون۔
بی وائی سی سوراب نا پاننگ ءِ کہ زہری ٹی بھلو کچ ئسیٹی بندغ آتہ زوراکی ئٹ بیگواہ کننگانے۔ ہرانا سوب آن الس و اونا خاہوت آتا پارہ غان زہری ٹی شٹرڈاؤن ہڑتال و کوئٹہ کراچی سوراب نا خُڑک سی پیک کسر ئے بند کرسا برانز کننگ ءُ۔
اوفتا پاننگءِ کہ بیگواہ مروک آ بندغ آتا ویل دے پہ دے زیات مننگ ءِ۔ نن بندغی حق آتا تنظیم آتیان خواست کینہ کہ اوفک بیگواہ کننگوک بندغ آتا آجوئی کن تینا کڑدارئے سر تیر و دا ویل ئے جہانی تیبر آ مونی ہتیر۔نن زیمی مروکا خاہوت آتون اوار اُن اوفتا جہد ئٹی کمک مرون۔
جارکش پارے کہ نن سوراب نا غیرتی آ الس آن خواست کینہ کہ اوفک بیگواہ کننگوک بندغ آتا خاہوت آتون اوار مرسا اواری نا درشانی کیر۔
