بلوچ سلاہ بند تنظیم آتا امبریلہ براس ئنا جارکش بلوچ خان میڈیا ٹی شنگ مروکو درشان ئسیٹی پارے کہ سرمچار آک تیوعہ بلوچستان ئٹی 42 ٹک آتا کوزہ گیر لشکر، عکسری تنصیبات، گیس پائپ لائن، معدنیات دروکا لاری، ڈکھکوک ادارہ تا کارندہ و پن ئنا ڈیتھ اسکواڈ نا کارندہ تے 45 جتا جلہو تیٹی نشانہ کریر۔ براس ئنا سرمچار آک کوسٹل ہائی وے، رخشان، خضدار و ہرنائی ٹی کسرتا شش جاگہ آ ناکہ بندی کریر و اِرا کاروائی تیٹی دشمن لشکر نا توفک آتے ہم ہرفیر۔ دا جلہو تیٹی کوزہ گیر لشکر نا میجر حسیب تون اوار 20 کارندہ خلنگا و پاکستانی لشکر ئے سخت مالی نسخان ہم رسینگا۔ دا جلہوک بلوچ شہید آتا دے 13 نومبر نا مناسبت ئٹ کننگار۔
بلوچ راجی آجوئی سنگر نا سرمچار آک پنچ شمبے نا شام ہرنائی ٹی زیارت منگی ڈیم ئنا ٹک آ کسرئے تفیسہ لاری تا سنیپ چیکنگ کریر ہندا وخت پاکستانی لشکر نا اِرا کارندہ تے دزگیر کننگا و پدا سزائے موت ترسا اوفتے خلنگ مس۔
پنچ شمبے نا سہب ہندا ٹک آ سر مروکا پاکستانی لشکر نا بکتر بند لاری ئے ریموٹ کنٹرول آئی ای ڈی ٹی نشانہ کننگا ہراٹی پاکستانی لشکر نا لورالائی سکاؤٹس نا میجر حسیب راولپنڈی نا ہندی تون اِرا کارندہ کھسک و مُسہ کارندہ سخت ٹپی مسُر بکتر بند ہم بھُس مس۔
پنچ شمبے نا شام براس ئنا سرمچار آک اورماڑہ و پسنی نا نیام مُسہ جاگہ تا جعفری کور،خواری چیک پوسٹ و چائی نا ٹک آ ناکہ بندی کرسا لاری تا سنیپ چیکنگ کریر۔
سرمچار آک اورماڑہ نا خُڑک بسول نا ہند چائی نا ٹک آ پاکستان کوسٹ گارڈز نا بھلا کیمپ ئے جلہو ئٹی نشانہ کریر، اسہ گھنٹہ آن گیش برجاء مروکا جلہو ئٹی سرمچار آک راکٹ و ایلو بھلا سلاہ تیٹ دشمن ئے نشانہ کریر ہراٹی دشمن نا مُسہ حفاظتی چوکیک بھُس مسُر۔ جلہو ئٹی کوزہ گیر لشکر نا مُسہ کارندہ ہمو جاگہ خلنگا و پنچ کارندہ ٹپی مس۔
سرمچار آک مکران نا کوسٹل ہائی وے، اورماڑہ و پسنی نا نیام خواری نا علاقہ ٹی کوسٹل ہائی وے پولیس نا چوکی آ جلہو کرسا کارندہ تے دزگیر کریر پدا کارندہ تا توفک و ایلو سامان تے تینا کوزہ ٹی ہلیسہ کارندہ تے یلہ کریر۔
ہندا جاگہ آ سرمچار آک مکران کوسٹل ہائی وے و اورماڑہ نا خُڑک خواری نا ٹک آ استحصالی کمپنی نا مشینری و کیمپ ئے ہُشار و ہندا وخت معدنیات دروکا لاری تے ہم نشانہ کریر۔
براس ئنا سرمچار آک خضدار نا بھلا کسرئے اِرا گھنٹہ اسکان تفیسہ سنیپ چیکنگ کریر۔ سرمچار آک وڈھ ئنا ہند کراڑو نا خُڑک کوزہ گیر پاکستانی لشکر و ڈکھکوک ادارہ تا اڈ تروکا پن ئنا ڈیتھ اسکواڈ نا اہم انگا کارندہ مہر اللہ محمد حسنی نا قافلہ ئے جلہو ئٹی نشانہ کریر۔ جلہو ئٹی ڈیتھ اسکواڈ نا اِرا کارندہ خلنگا و مُسٹ ٹپی مس۔
کوزہ گیر لشکر نا مونا سرینڈر مروکا مہر اللہ محمد حسنی ، بلوچ عوام آ زوراکی، مشکے و ایب کھیب ئٹ لشکر کشی ٹی براہ راست اوار مننگ تون جہد کار آتے شہید کننگ ئٹی ہم تُد اسک، راجی غداری کروکا مہر اللہ محمد حسنی براس ئے مطلوب اسک۔
براس ئنا سرمچار آک تربت نا ہند گنہ ٹی پاکستانی لشکر نا پوسٹ ئے جلہو ئٹی نشانہ کریر، سرمچار آک دشمن لشکر آ گرنیڈ لانچر تیتون کیہی گولہ خلکر ہرا سہبمندی ئٹ تینا ہدف تے آ سر مسُر۔
تربت ئٹی آبسر نا ٹک آ پاکستانی لشکر نا ٹریننگ سینٹر ئے براس ئنا سرمچارآک جلہو ئٹی نشانہ کریر، جلہو ئٹی دشمن لشکر نا کیمپ آ کیہی گرنیڈ لانچر نا گولہ خلنگا۔
تربت نا ہند آبسر ئٹی ابدروک پوسٹ آ سرمچار آک گرنیڈ لانچر آن کیہی گولہ خلکُر ہرا سہبمندی ئٹ تینا ہدف تا لگار۔
تربت نا ہند ناصر آباد ئٹی کوزہ گیر پاکستانی لشکر نا کیمپ آ پنچ شمبے نا شام سرمچار آک راکٹ و ایلو بھلا سلاہ تیٹ جلہو کریر ہراٹی دشمن ئت جانی و مالی نسخان ہرفوئی تمانے۔
کیچ ئنا ہند زامران ئٹی کنڈ کاپران نا ہند آ ساڑی دشمن نا چوکی ئے خودکار سلاہ تیٹ ٹک کننگا۔ ہراڑان دشمن ئے جانی نسخان مس۔
سرمچارآک دوانزدہ نومبر نا شام کرکی تجابان ئٹ ساڑی دشمن پاکستانی لشکر نا چوکی ئے بھلا و خودکار سلاہ تیٹ ٹک کریر۔ جلہو ئٹی دشمن لشکر نا اِرا کارندہ ٹپی مس۔
براس ئنا سرمچارآک بلیدہ ئٹی زونداں نا ہند آ دشمن لشکر نا اَسہ پوسٹ ئسے راکٹ و ایلو سلاہ تیٹ ٹک کریر ہرانا سوب آن دشمن لشکر نا اَسہ کارندہ ئس ہمو وخت کھسک و مُسہ کارندہ ٹپی مسُر۔
سرمچارآک زامران ئٹی صابونی نا ہند آ کوزہ گیر لشکر نا کارندہ تے ہموتم خودکار سلاہ تیٹ ٹک کریر ہراتم او پندا گشت کننگ اسُر، جلہو ئٹی اَسہ دشمن کارندہ ئس خلنگا و اِرٹ ٹپی مس۔
ھوشاپ ئٹی سرمچارآک پاکستانی لشکر نا بنجائی کیمپ ئے ٹک کریر، سرمچارآک راکٹ و گرنیڈ لانچر تیٹ کیہی گولہ خلکر ہرانا سوب آن دشمن لشکر نا چھار کارندہ ٹپی مس و پین جانی و مالی نسخان ہم مون تروئی تما۔
تمپ ئٹی آسیا آباد نا ہند آ سرمچارآک پاکستانی لشکر نا کیمپ ئے جلہو ئٹی ٹک کریر ہراڑان دشمن ئے نسخان مون تروئی تما۔
اَسہ پین جلہو ئسیٹی سرمچارآک سینزدہ نومبر نا شام چھار بجہ آ آواران نا ہند بزداد گندہ کور ئٹی ساڑی دشمن لشکر نا کیمپ ئے مارٹر گولہ تیٹ ٹک کریر۔ مارٹر گولہ آک کیمپ ئنا تہٹی تمنگ نا سوب آن دشمن ئے بھاز جانی و مالی نسخان ہرفوئی تما۔
سرمچارآک یانزدہ نومبر نا شام مشکے گجر ئٹی ساڑی کوزہ گیر پاکستانی لشکر نا کیمپ ئے ارٹنگا نیمغان سخت جلہو ٹی ٹک کریر۔ سرمچارآتا بھلو کچ ئس کیمپ آ پوسکن و بھلا سلاہ تیزت جلہو کریر، دا جلہو بیست ءُ پنچ منٹ اسکان برجاء مس، جلہو ئٹی کم آن کم دشمن نا مُسہ کارندہ خلنگا و کیہی ٹپی مس۔
سرمچار آک یازدہ نومبر نا شام مشکے نا ہند جیبری ٹی برجاء انگا دشمن لشکر نا چوکی ئے بھلا و خودکار سلاہ تیٹ جلہو کرسا دشمن ئے جانی و مالی نسخان تسُر۔
سرمچارآک دوازدہ نومبر نا شام رخشان سوراپ ئٹی سی پیک روٹ آ مُسہ گھنٹہ اسکان ناکہ بندی کرسا اوڑے ساڑی انگا لیویز تھانہ آ جلہو کرسا سلاہ و ایلو سامان تے کوزہ ٹی ہلکر۔
براس ئنا سرمچارآک چھار شمبے نا دے پنجگور شار ئٹی پاکستانی لشکر نا بنجائی کیمپ نا حفاظتی چوکی ئے ٹک کریر، سرمچارآک دشمن آ گرنیڈ لانچر تیٹ کیہی گولہ خلکر ہرانا سوب آن کم آن کم مُسہ کارندہ ٹپی مس۔
سرمچارآک سئے شمبے نا دے پنجگور نا ہند پروم ئٹی کلہ کور نا ہند آ دشمن لشکر نا خلکوکا جاسوسی کیمرہ و آلہ تے اَسہ کاروائی سیٹی بھس کریر۔
سرمچارآک کیچ ئنا ہند ہیرونک ئٹی ساڑی کوزہ گیر پاکستانی لشکر نا چوکی آ خودکار سلاہ تیٹ جلہو کرسا دشمن ئے جانی و مالی نسخان تسُر۔
براس ئنا سرمچارآک کولواہ ڈنڈار ئٹی کوزہ گیر پاکستانی لشکر نا بنجائی کیمپ ئے اَسہ جلہو ئسیٹ ٹک کریر، چھل منٹ اسکان برجاء مروکا جلہو ئٹی راکٹ و ایلو سلاہ تے کارمرز کننگا ہرانا سوب آ اِرا دشمن کارندہ ہموخت خلنگا و کم آن کم مُسٹ ٹپی مس، ہموتم سرمچارآک سرویلنس ڈرون ئے ہم خلیسہ بٹیر۔
سرمچارآک گڈگی واٹر سپلائی و بالگتر ٹی چمگ نا ہند آ دشمن لشکر ئے جلہو ئٹ ٹک کریر۔
براس ئنا سرمچارآک دوانزدہ نومبر نا شام ہشت بجہ غا مستونگ نا ہند کھڈ کوچہ ٹل نا ہند آ کوزہ گیر پاکستانی لشکر نا کارندہ تے جلہو ئسیٹ ٹک کریر، جلہو بیست منٹ اسکان برجاء مس، جلہو ئٹی دشمن لشکر نا مسہ کارندہ خلنگا۔ جلہو آن پد دشمن ہرے اسکان لس مخلوق آ سمکاری کرے و مارٹر گولہ خلک۔
سرمچارآک یازدہ نومبر نا شام شش بجہ غا مستونگ کسر آ کیڈٹ کالج کراس نا ہند آ ساڑی کوزہ گیر پاکستانی لشکر نا چیک پوسٹ آ بھلا و خودکار سلاہ تیٹ جلہو کرسا دشمن ئے جانی و مالی نسخان تسُر۔
سرمچارآک دوازدہ نومبر نا شام شش بجہ آ خاران شار نا ریڈ زون آ ساڑی ایم آئی و آئی ایس آئی دفتر تیا گرنیڈ لانچر آن کیہی گولہ خلکر، جلہو ئٹی دشمن ئے جانی و مالی نسخان ہرفوئی تما۔
براس ئنا سرمچارآک گنداوہ ٹی کوزہ گیر پاکستانی لشکر نا ذیلی فورس پولیس ئے اَسہ جلہو ئسیٹی ٹک کریر۔
سرمچارآک چھار شمبے نا شام دکی آن چمالنگ کسر جوڑ کروکا کمپنی آ جالار نا ہند آ جلہو کرسا کل مشینری تے ہُشیسہ بُھس کریر۔
براس ئنا سرمچارآک کوہلو ٹی ببر نا ہند آ کوزہ گیر پاکستانی لشکر نا اسہ پوسٹ ئسے جلہو ئٹی ٹک کریر ہراٹی دشمن لشکر نا مُسہ کارندہ ٹپی مس۔
چھار شمبے نا دے براس سرمچارآک بارکھان نا ہند تومنی، بغاؤ ٹی کوزہ گیر پاکستانی لشکر نا آلہ کار و وزیر عبد الرحمان کھیتران نا نجی جیل ریسٹ ہاؤس آ تعینات ڈیتھ اسکواڈ نا کارندہ تے ٹک کریر ہراٹی چھار کارندہ ٹپی مس۔
سرمچاراک اسہ موبائل نا ٹاور ئسے بُھس کریر و نجی جیل ئنا کارندہ تا تمبو تے ہُشار ۔
براس ئنا سرمچاراک پنچ شمبے نا شام آ گْوادر جی ٹی گیٹ آ تولوک پاکستانی لشکر نا نیوی کارندہ تے آ چغلی بمب ئٹ جلہو کریر ہراڑان مُسہ کارندہ ٹپی مس ۔
براس ئنا سرمچاراک ہفتہ نا شام آ پسنی ٹی کوسٹ گارڈ کیمپ ئنا گیٹ آ تولوک کارندہ تے چغلی بمب ئٹ ٹک کریر ہراڑان مُسہ کارندہ ٹپی مس ۔
سرمچاراک بولان ، پیر غیب کراس آ پاکستانی لشکر نا چوکی آ بھلا سلاہ تیتون جلہو کریر ۔ جلہو آن دشمن لشکر نا کارندہ ئس مرگ ئنا گواچی مس ارٹ ٹپی مس۔
اسہ پین جلہو ئسیٹی سرمچاراک 12 نومبر نا شام 9:30 آ بولان نا ہند کھجوری ٹی دشمن نا اڈ کروکا جاسوس کیمرہ و سامان تے ٹک کریسہ بُھس کریر ۔
براس ئنا سرمچاراک صحبت پور ئنا ہند گورناڑی رحمت پل نا ہند آ پولیس چوکی ئےجلہو ئٹ ٹک کریر ۔
سرمچاراک راجھان نا ہند بستی نواز نا خُڑک آ 36 انچ گیس ئنا پائپ لائن ئے تراک ئٹی بُھس کریر ۔
جارکش ایسر ئٹ پارے کہ براس بلوچستان نا آزادی و بلوچ قوم ئنا رکھیفنگ کن تینا جان تے ندر کروکا شہید آتے 13 نومبر نا موقع آ خراج تحسین ندر کریسہ دا عزم ئے کیک کہ شہید آتا دتر تا بیر اسہ آزاد و خوشحال بلوچستان نا دروشم ئٹ مرو ۔ براس بلوچ راج ئنا ہمت آن دا جنگ ئے تینا گُڈی ہند آ ایسر کریسہ بلوچ شہیداتا ارمان تے پورو کرو۔
