ڈاکٹر ماہرنگ بلوچ و بلوچ یکجہتی کمیٹی نا بنجائی باسک آک مستونگ بمب تراک ئٹی کھئوکا چُنا تا خاہوت آتون تعزیت کن مستونگ آ بسُر۔
دا وخت آ ڈاکٹر ماہرنگ نہادی آ ساہ تا نسخان آ ڈکھ و فریشانی نا درشانی کرے۔
او پارے کہ مستونگ نا اُلس ئے دلیر و شعور یافتہ مننگ نا سزا تننگک۔
او پارے کہ پُھل کون آ معصوم آ چنا تیان ہم دژمن خلیس نا گواچی ءِ۔
او پارے کہ بلوچ یکجہتی کمیٹی خاہوت نا ڈکھ و فریشانی ٹی اوفتتون بریبر اوار ءِ۔
ڈاکٹر ماہرنگ بلوچ ودیک پارے کہ مستونگ بمب تراک بلوچ زنک کشی نا چرجوئی ءِ، ہراٹی دژمن کھور مرسا معصوم آ چنا تِہ ہم بخشنگ اف۔
او پارے کہ مستونگ بلوچستان نا سیاسی و مزاحمتی گڑھ جوڑ مسنے۔ ہامدیکان مستونگ نا حالیت آتِہ خراب کننگ ءُ تاکہ اُلس تینا حق ئکن پیشتمپ و اسکول نا چنا تِہ ٹک کننگ نا مسخت ہندادے کہ بلوچ خواننگ آن مر مرے و تینتو مروکا بےانصافی تیان بے خبر مرے۔
