بلوچستان لبریشن فرنٹ (بی ایل ایف) نا ترجمان تینا شنگ کروک بیان ئٹ پارے کہ سرمچارک 24 اکتوبر نا ننکان نُہہ بجہ غا تربت نا علاقہ آباد دوکرم ئٹ کوزہ گیر لشکر ئے چغلی بم جلہو ئٹ ٹِک کریر، جلہو ئٹی کوزہ گیر لشکر نا اِرا کارندہ ٹپی مسر۔
او پارے کہ دا جلہو ہموتم کننگا ہراتم کوزہ گیر لشکر تینا سنگر تیان پیشِن بسس و ہندی مخلوق ئے پٹ ءَ پول نا پِنا خلیفنگ ئٹی اس، اوفتے بے شرف کننگ اس۔ کوزہ گیر لشکر نا دا حکمت عملی ہڑدیئی کاریم تا بشخ ئس ءِ۔ ہرا نا رد ئٹ او لس مخلوق ئے بے سوَب پٹ ءَ پول کیرہ و فریشان کیرہ۔
اونا پاننگ اس کہ تنظیم نا سرمچارک و انٹیلیجنس ونگ لشکر نا ہر سُرپُھر آ نظر تِخسہ ءِ و لشکر ئے ہر جاگہ غا دک خلنگ کِن ساڑی ءِ۔ بی ایل ایف بحیثیت اسِہ راجی تنظیم ئس تینا مخلوق نا بے شرفی تِہ ہچ وڑ آ سگِنگ کپک، دشمن ئے لس مخلوق نا کُمک ئٹ عبرتی ءُ شکست ایتک۔
ترجمان نا ودیک پاننگ اس کہ پین اسِہ جلہو ئسیٹی سرمچارک 25 اکتوبر نا سُہب ئنا یانزدہ بجہ غا آوران نا علاقہ مشکے اوگار ئٹی ساڑی کوزہ گیر لشکر نا چوکی ئے ٹِک کریر۔
او پارے کہ بی ایل ایف نا اسنائپر شوٹرک چوکی آن پیشن سلوک لشکر نا کارندہ ئے خلُکر۔
او ایسر ئٹ پارے کہ بلوچستان لبریشن فرنٹ دا جلہو دا زمہ واری ئے ارفِک و کوزہ گیر لشکر نا بلوچستان آن پیشتمنگ اسکان لشکر و اونا ماڑی تیا جلہو کرون۔
