
بلوچستان نا علاقہ بارکھان ئٹی پاکستانی لشکر نا لشکر کشی برجاء، موبائل نیٹورک تِہ بند کننگانے۔
حوال تا رد ئٹ کوہلو نا ہند بارکھان ئٹی ہنوکا اِرا دے آن پاکستانی لشکر بھلو کچ ئسیٹی چرّینگ ءِ۔
حوال تا رد ئٹ کیہی لاری و موٹر سائیکل آتا کاروان کیمپ آ سر مسنے و بارکھان نا جہہ نوئے شم، کُجل، برگ، ہنار کڈ و ہیب کھیب ئٹ لشکری کارندہ غاک مُستی گھام خلنگ ءُ۔
عسکری کوالخواک موبائل نیٹورک تِہ بند کرینو۔ کالخواک دارد ئٹ شابیتی حوال تتنو۔
یات مرے کہ بلوچستان نا جتا جتا علاقہ تیٹی لشکر کشی برجاء ءِ۔ گوادر و کیچ تون تفوک ہند آک گورکوپ و ہیب کھیب لشکر کشی نا پلویڑ ئٹی ءُ۔
ہندا علاقہ تیٹی ہن ءَ بر نا کسر تِہ لشکری کارندہ غاک بند کرینو و حوالکاری نظام مفننگ نا سوب آن نسخان تا بابت ئٹ دائسکان شابیتی حوال رسینگتنے۔