ڈاکٹر نسیم بلوچ “جہانی سندھی کانگریس” نا کنڈ آن اڈ تروک سی و ششمیکو جہانی کانفرنس ئٹ ہیت کرسا پارے کہ سندھی راج ئنا ویل ہم بلوچ راج ئنا وڑ بندغی حق آتا ویل اف بلکہ راجی آجوئی نا ءِ۔ غلام آ راج آتیکن بندغی حق آتا ہچو تصور مفک انتئے کہ غلامی نا حالیت ئٹی حق آتا ہیت بیرہ اسہ رد تننگ ئس ءِ۔
او پارے کہ سندھی و بلوچ سرزمینک اینو دڑد آتا گواچی ءُ، ولے نن مایوس افن۔ ننا راست انگا راجی کسر آ ہِننگ اُن، و اینو جہان نا مونا، ننا راج ئنا مونا پاکستانی تادیک پھاش مسنو۔ ہراتم ریاست بےدادی نا کسر ئے ہلیک، تو دا اندا ہیت ئنا شاہدی مریک کہ بیوس آ راج، چائے و پھاش وڑ ئٹ زیر دست خننگک، ولے گواچن ئٹ ریاستی عسکری خُلیس ئے باء تروک مریک۔ اینو مخلوق پیشتمنگ ءِ، توار بڑز کننگ ءِ، و مزاحمت داسا السی نفسیات نا بشخ جوڑ مننگ ءِ، اندا ننا سرسوبی ءِ۔
او سیوتی کن بیرہ ہیت آتا جاگہ غا سہی کنڈ آ ہِننگ کن کسر ئٹی عملی اسہ ڈولی آ زور تس و پارے کہ نن سیوتی نا سواد آتیان جوانیکا واخب ان، ولے ننا سیوتی نا روتہ غاک ننا عمل ئٹی ڈھکوک ءُ، ہراتم ننا عمل و ننا مزل اسہ پھاشو کسر ئسے آ مریک تو عمل نا پِڑ ئٹی سیوتی و اسٹ ایلو نا دڑد ئے بشخنگ اڑزان مریک۔
او پاکستان تون پوسکن آ چاگڑدی معاہدہ نا اومیت آتِہ شیف خلِسہ پارے کہ منہ سینئر سیاستدان ننے اسہ پوسکنو چاگڑدی معاہدہ ئسے نا بارث ئٹ رد تننگ نا کوشست کننگ ءُ، بھازی آن سندھ ئٹی دا ہیت گیشتر مننگ ءِ۔ دا زوراکی نا نظام ئے برجاء تخنگ نا اسہ پوسکنو وڑ و ڈول ئس ءِ ولے ننے تینا کسر آن مُر مروئی اف و تینا اندا کسر آ تینا راج ئے پُہہ کروئی ءِ کہ او دا چم بازی ٹی بفس، انتئے کہ غلامی نا ہمرو نظام ئس مرے اوٹی ہچو گواچنی بدلی بفک ایسکان کہ آجوئی و خودمختاری دوئی متنے۔
ڈاکٹر نسیم پارے کہ کوزہ گیر آجوئی خواہوکا تہ شونداری نا دشمن پائک ولے گواچن دادے کہ کوزہ گیر ہچ وخت ہم پد تموکا راج آتہ شونداری تتنے اگہ کوزہ گیر شونداری تننگ کریکہ تو برطانیہ، ہرا کہ سائنس و جدیدیت نا پِڑ آ جہان نا غٹ آن زیات شون ہلوک چاگڑد آتیان اسٹ اسک، او ہندوستان ئے شونداری انتئے تتو؟
او پارے کہ آجوئی و شونداری یورپ ہم مفت ئٹی دوئی کتنے اوفک ہم اسہ تہارمئو وخت ئس خنار و دتر نا جوک وہار ہرافتیان ننے ہم گدرینگوئی تمو۔ ننے پین زیات تاغت ئٹ کوکار کروئی تمو، زیات ڈکھ سگوئی تمو، انتئے کہ ننا دشمن بھاز بے رحم ئس ءِ۔ ننا دشمن نا لشکر اسہ مذہبی جنونی نہار ئس ءِ، ہرا ننا زنک کشی ئے تینا ایمانی فرض پُہہ مریک۔
او بیوس آ راج آتیا سیاستدان و نوشتکار آتہ کوزہ گیر نا نفسیاتی و دود ربیدئی زہم آن پیشتمنگ آ زور شاغسہ پارے کہ پاکستان آن مُست سندھ و بلوچستان ئٹی ہچو اقلیت الو، اگہ کس ہندو ئس اس یا پین مذہب ئسے آن تعلقداری تخاکہ ہم او تینا وطن ئٹی ایلوفتتون بریبر اسک۔ اینو پاکستانی طرز سیاست نا زہم نا سوب آن نن ہم اقلیت پانہ ہراڑان ننے پرہیز کروئی ءِ۔
