بلوچ نیشنل موومنٹ نا نمائندہ سمل بلوچ جنیوا ٹی اقوام متحدہ نا بندغی حق آتا پنجاہ و ہفتمیکو مجلس ئٹی تران کرسہ بلوچ راج ئنا برخلاف پاکستانی زوراکی تہ پھاش کرے۔ او ظلم و تادی تا سرجمی ئٹ ہیت کرے۔ بلوچستان نا ساڑی آ وخت آ جہانی نظر و دا بارت ئٹ زوت کاریم نا خواست کرے۔
تینا تران ئٹی سمل بلوچ ریاست نا مروکا بھلا زوراکی تا ہیت کرسہ پارے کہ ہزار آ بلوچ آتہ پاکستانی فوج بیگواہ کرینے ہرافتا ہِچ ڈس اف۔
او بی این ایم نا بندغی حق تنظیم پانک ئنا کچ و حساب ئے مون آ ہیس، ہرانا حساب نا رد ئٹ جنوری 2024 آن جون 2024 اسکان 269 بندغ ئے بیگواہ کننگانے۔ ہرافتیٹ نیاڑی، نرینہ و چُنا ارے۔ ہندن 25 بندغ بےقانودی ئٹ خلّنگانے و 160 ئے لٹ کُٹ کننگانے۔
او دا زوراکی تہ پاکستانی ریاست نا کُنڈ آن بلوچ راج ئنا تینا واک ئنا جہد ئے شیف شاغنگ نا کوشست پارے۔ فوجی لشکرکشی، خلّنگ و خُلیفنگ ازدے مفسہ بلکہ بلوچ راج ئے چُپ کرفنگ نا برجاء غا مہم نا بشخ ءُ۔
سمل بلوچ پیدواری کرے کہ ریاستی زوراکی تا نہ بیرہ سیاسی جہدکارک بلکہ لس مخلوق ہم گواچی مننگ ئٹی اے، ہراڑان بلوچستان ئٹی خُلیس و ظلم تالان ءِ۔
دا زوراکی تا کیئی ثبوت منّنگ آن پد ہم جہانی کاریم نا کمتی آ او افسوس کرسہ جہانی ادارہ آتیان بلوچ نا ویل آتا ایسری کن گچین وڑئٹ کاریم نا بےسوبی پارے۔
او پارے کہ دا بندغی حق آتا برخلافی و ہرا زنک ایسری نا بریبر ءُ۔ دافتہ جہانی مخلوق بھلو کچ ئس نظر ئٹی ہتپک، دنیا نا بےعملی بلوچ راج ئتون اسہ بھلو بےانصافی سے۔
تینا تران نا گُڈی ٹی سمل بلوچ اقوام متحدہ و جہانی مخلوق آن خواست کرے کہ او بلوچستان ٹی کروکا زوراکی تا پاکستان آن حساب ہلیر، او اقوام متحدہ نا جنرل اسمبلی آ زور شاغا کہ او قرارداد منظور کے ہراٹی بلوچ راج آ پاکستانی زوراکی تا برخلاف و اسہ واک تخوکو بلوچ ریاست ئسے نا مخ تفی مرے۔ دہنا کاریمک ظلم آتان خلاصی و بلوچ اُلس نا تینا واک ئنا منّنگ ئے کمک تیرہ۔
او پارے کہ بلوچ جہد بیرہ اسہ علاقئی ویل ئس اف بلکہ جہانی بندغی حق آتا و انصاف نا معاملہ سے۔
