بلوچستان لبریشن فرنٹ نا ترجمان میجر گہرام بلوچ میڈیا ٹی شنگ کروک تینا درشان ئٹی پارے کہ سرمچارک نوشکی، تُربَت و زامران ئٹی مُسی جتاؤ جلہو تیٹ دژمن نا چھار کارندہ مرگ ئنا گواچی کریر و کیہی تِہ ٹپی کریر۔
او پارے کہ سرمچارک یک اکتوبر سئے شمبے نا دے شام ئنا ہفت بجہ غا نوشکی نا ہند زرین جنگل ئٹی کوزہ گیر لشکر نا کیمپ ئے راکٹ لانچر و پوسکُنا سلاہ تیٹ جلہو نا گواچی کریر، ہراٹی پاکستانی لشکر نا کیمپ مون آن تباہ مس۔ جلہو نا گواچی مروکا مُسہ لشکری کارندہ ہند آ کھسکُر و کیہیک ٹپی مسُر۔
او ودیک پارے کہ اَسہ پین جلہو ئسیٹی یک اکتوبر نا شام ہشت بجہ غا تُربَت شار ئٹی تعلیمی چوک آ دژمن نا چیک پوسٹ آ چغلی بمب جلہو کریر ہراڑان دژمن نا اَسہ کارندہ ئس کھسک و جونیئر آفیسر نائیک اشرف و شاہی ظاہر ٹپی مسُر۔
اونا پاننگ اس کہ تراک آن پد کوزہ گیر لشکر ہموڑے سر مرسا او جاگہ ئے ہُرا و سرمچار آتِہ پَٹنگ بناء کرے ولے سرسوب حکمت عملی تا سوب آن سرمچارک سرسلامت تینا ٹھکانہ تیا سر مسر۔
میجر گہرام بلوچ پارے کہ مُسٹمیکو جلہو ئٹی سرمچارک 2 اکتوبر نا دے دوانزدہ بجہ غا زمران نا ہند ڈمبان دشتک ٹی ساڑی کوزہ گیر پاکستانی لشکر نا چوکی تیا پوسُکنا و خودکار سلاہ تیٹ جلہو کریر ہرانا سوب آن دشمن نا اَسہ کارندہ ئس ٹپی مس۔
ترجمان پارے کہ بی ایل ایف نا کاروائیک تیبہ بلوچستان ئٹی پاکستانی لشکر، لشکری ماڑی و دژمن نا کمکار تیا ترندی ئٹ برجاء ءُ ہراڑان دژمن لشکر نفسیاتی دباؤ نا گواچی ءِ۔
او ایسر ئٹ پارے کہ بلوچستان لبریشن فرنٹ دا مُسٹنگا جلہو تا زمہ واری ئے ہرفک و آزاد بلوچستان اِسکان دژمن نا لشکر ئے ٹک کرو۔
