بلوچ راجی مُچی نا وختا نوشکی ٹی اڈ ہلوک برانز ئٹ پاکستانی لشکر نا کریک ڈاؤن و سمکاری آن ٹپی مروکا ورنا نا کراچی ٹی علاج مننگ اس ہراڑے اینو او کذیت کرے۔
شابیتی حوال تا رد ئٹ برجاء سال اگست ئٹی بلوچ یکجہتی کمیٹی نا راجی مُچی برانز تا وختا نوشکی ٹی برانزی تیا پاکستانی لشکر نا سمکاری آن ٹپی مروکا ورنا اینو کراچی ٹی کذیت کرینے۔
پاکستانی لشکر نا سمکاری آن ٹپی مروکا ورنا حکمت اللہ نا علاج اِرا تو آن کراچی نا جناح اسپتال ئٹی مننگ اس ولے او ٹپ آتیان دراخ مننگ کتو و دا جہان آن رخصت کرے۔
اونا جون ئے اینو نوشکی آ راہی کننگانے ہراڑے گڈی دود آتیان پد اودے گُڈی ہند کننگو۔
یاتی مرے بلوچ یکجہتی کمیٹی نا راجی مُچی نا برانز آتا وختا پاکستانی لشکر جتا علاقہ آتیٹ برانزی تیا سمکاری کریسس و کیہی بندغ آک ٹپی مسوسر و کیہیک شہید مسوسر۔ ہموتم نوشکی ٹی برانز نا وختا پاکستانی لشکر نا سمکاری ٹی اِرا بندغ ٹپی مسوسر ہرافتیان اسٹ حکمت اللہ اس، و حمدان بلوچ پنیئو ورناس ہند آ ساہ تسس۔
