بلوچ نیشنل موومنٹ نا چیئرمین ڈاکٹر نسیم بلوچ چاگڑدی حوالکاری تلہ ایکس آ پاکستانی لشکر نا دو آن زوراکی ئٹ بیگواہ کننگوک جہانزیب بلوچ نا خاہوت آتا کنڈ آن کشوکا برانز ریلی ٹی تران کروک اونا مسڑ نا ویڈیو سے آ پوسٹ کرسا پارے کہ جہانزیب بلوچ نا چُنیکا مسڑ خڑینکی آ خن تیٹ تینا باوہ نا آجوئی نا خواست کننگ ءِ ہرادے ہشت سال مُست پاکستانی لشکر زوراکی ئٹ بیگواہ کرینے۔
ڈاکٹر نسیم بلوچ پارے کہ دا اُست ئے لڑزفوکا خواست بلوچستان ئٹی بیگواہ مروکا بندغ آتا خاہوت آتا دڑد ئے پاش کیک، ہرا تینا بندغ آتیکن انصاف و ورندی خواہنگ ءُ۔
