درو بارکھان آن پاکستانی لشکر نا کرنل ئسے نا دو آن بیگواہ کننگوک صحافی حیات خان آجو کننگانے، اندن بارکھان آن بیگواہ کننگوک پین اِرا بندغ تون اوار گوادر آن بیگواہ کننگوک ورناس ہم آجو کننگانے۔
بارکھان آن درو بیگواہ کننگوک صحافی حیات خان کھیتران، حیات شاہ و آصف بلوچ آجو کننگانو۔
صحافی نا ایلم حفیظ اللہ کھیتران اونا آجوئی ئے پک کرسا پاینے کہ اسہ ٹی وی چینل ئسے ٹی کاریم کروک صحافی حیات کھیتران درو ایف سی کرنل نا کنڈ آن پاکستانی لشکری کیمپ آ خواہفنگاسس ہراکان او بیگواہ کننگاسس۔ ولے اینو آجو مرسا کوہلو پریس کلب آ بسنے۔
حیات کھیتران نا آجوئی کن اینو بارکھان نا شار رکھنی ٹی صحافی تا کنڈ آن برانز کننگاسس و اونا آجوئی نا خواست کننگاسس۔
داکان بیدس گْوادر آن درو پاکستانی ایجنسی تا دو آن بیگواہ کننگوک خاران نا ہندی ورنا نصیب اللہ ولد نزیر حسین ہم آجو مسنے۔
