پاکستانی لشکر و ایجنسی تا کُنڈ آن آپریشن “ہیروف” نا بلوچ جند ندر آتا خاہوت آتے پاننگانے کہ او بی ایل اے نا برخلاف مہم چلّفر۔
حوال تا رِدئٹ داسکان خاہوت آک اوفتا ہیت ئے منّنگ ئٹی افس ولے اوفتے دڑکو تننگانے کہ اگہ او ویڈیو جوڑ کتوَس تو اوفتا خاہوت آتا ایلو بندغ آتے زورئٹ بیگواہ کننگو یا کھسفنگو۔
ایلو نیمہ آ حوال رسینگانے کہ فوج جند ندر ماہل بلوچ نا باوہ و ایلو خاہوت نا مال و مڈی تا بارث ئٹ حوال ہلّنگ ئٹی ءِ۔
یات مرے کہ بیست و پنچ و بیست و شش اگست نا نیامیکو نن بلوچ آجوئی دوست سِلاہ بند تنظیم بی ایل اے نا کُنڈ آن آپریشن “ہیروف” بِناء کننگا۔ ہراٹی بی ایل اے نا سرمچار آک بلوچستان نا کیہی جہہ تا روڈ آتے تفیر۔
دا آپریشن ئے “ہیروف” نا پِن تننگا ہراڑے بیلَو (بیلہ) بلوچستان ٹی پاکستانی لشکر نا بھلو کیمپ ئسے آ مجید برگیڈ نا جند ندر آک جلہو کریر۔
ماہل بلوچ ہرا دریابی شار گْوادر نا ہندی ئس اس و تربت یونیورسٹی ٹی قانود خواننگ ئٹی اس۔ او بیلَو ئٹی آپریشن “ہیروف” ئٹی پاکستانی فوج ئنا کیمپ ئے جند ندر جلہو ئٹ ٹِک کریسس۔
