راشد حسین نا زوراکی نا بیگواہی و آجو مفننگ نا برخلاف بلوچستان نا بنجائی شار کوئٹہ ٹی اینو یک شمبے نا دے اونا خاہوت نا کنڈ آن اسہ ریلی ئس کشنگ مس و اونا آجوئی نا خواست کننگا۔
برانز ئٹ زوراکی ئٹ بیگواہ کننگوک بندغ آتا خاہوت آتیان بیدس سیاسی باسک آتا بھلو کچ ئس اوار مس۔ برانزیک دوٹی بیگواہ غا بندغ آتا عکس و بینر ہرفیسر و زوراکی نا بیگواہی و بلوچ زنک کشی نا برخلاف نعرہ خلنگ اسر۔
راشد حسین نا خاہوت نا پاننگ ءِ کہ او تدوکا پنچ سال آن ریاست آن انصاف نا امیت ئٹ عدالت آتیٹ پیشی تننگ ءُ و بیگواہ غا بندغ آتا کمیشن تیٹ اوار مننگ ءُ ولے اوفتے انصاف تننگ نا جاگہ غا اوفتے پین فریشان کننگک و عدالت آتیان کیس آتے ایسر کننگک۔ ہائی کورٹ اوفتا کیس ئے بِننگ ہم بند کرینے و تاریخ ئے پین مُستی کرینے۔
او بندغی حق آتا ادارہ و اقوام متحدہ آن خواست کرینو کہ او ریاست آن راشد حسین نا بابت ئٹ سوج کیر و راشد حسین نا آجوئی ٹی تینا کڑد ئے سر تیر و اوفتا پنچ سال ئنا ودار ئے ایسر کیر۔
یاتی مرے کہ راشد حسین نا خاہوت نا پاننگ ءِ کہ اودے 2018 نا 26 دسمبر آ متحدہ عرب امارات آن ڈھکوک ادارہ آک دزگیر کرسا پاکستان آ رادہ کریسر و داٹی متحدہ عرب امارات تون پاکستانی ادارہ غاک ہم تُد مسنو۔ پاکستان آ رادہ کننگ آن گڈ راشد حسین اینو اسکان بیگواہ ءِ۔
