حوال تا رد ئٹ اینو دو شمبے نا دے بیگواہ مروکا بندغ آتا نیمہ آن تینا بندغ آ تا آجوئی کن و ریاستی جبر نا برخلاف خاران آن کوئٹہ آ ہنوکا کسر ئے ہِن ءَ بر کن بند کننگانے۔
شابیتی حوال تا رد ئٹ دہ سال آن بیگواہ عبدالکریم میروانی ولد حاجی عبدالرزاق میروانی نا بھلا ایلم میر عبدالقدوس میروانی ئے اَسہ وائس ریکارڈ ئسے نا رد ئٹ ہراکہ ہندی جتاء وٹس ایپ گروپ آ تیٹ شنگ کننگانے کہ اونا اُرا سیاپٹ نا ہند آ ہنوکا شام و اینو دے ئنا ایف سی و انٹیلیجنس ادارہ آ تا نیمہ آن چھاپہ خلنگا، زالبول آ تیا بیدادی کننگا و اُرا نا مڈی تے پرغنگا، میرعبدالقدوس میروانی نا ایلم تون اوار اِرا خُڑک ئنا سیال ئے دزگیر کرسا تینتو اوار نا دُرست ءُ جاگہ سے آ دننگا۔
اندا سوب آن اوفتا خاہوت نا نیمہ آن برانز کرسا اینو خاران آن کوئٹہ آ ہنوکا کسر ئے تینا بندغ آ تا آجوئی کن بند کننگا۔
او ودیک تینا وائس کلہو ئٹی خاران نا باشعور اُلس ئے برانز ئٹی اوار مننگ و بیگواہی تا برخلاف توار بُڑز کننگ نا خواست کریر۔
یاتی مرے کہ میر عبدالقدوس میروانی ہند ئنا اَسہ کونسلر اَسہ معتبر سیاسی و چاگڑدی باسک ئس ہم ارے، داکان مُست ہم اونا اَسہ ایلم عبدالکریم میروانی ئے دہ سال مُست بیگواہ کننگادس را دائسکان بیگواہ ءِ۔
