بلوچستان آجوئی سنگر (بی ایل ایف) نا جارکش گہرام بلوچ تینا درشان ئٹی پارینے کہ جمعہ نوزدہ جولائی اِرا ہزار بیست ءُ چھار آ بلوچ آجوئی دوست راہشون خواجہ واحد کمبر بلوچ نا سنگتاتون حوال متو۔ ہراڑا زوت پٹ ءُ پول کننگا تو سما تمّا کہ گِڑاس سِلابندو بندغ خواجہ واحد کمبر بلوچ ئے زورئٹ اسہ کار ئسیٹ شاغانُہ درینُہ۔
او پارے کہ داسکان نا پٹ ءُ پول نا حساب آ خواجہ واحد کمبر ئے پاکستان نا ایجنسیک بیگواہ کرینُہ۔ نن تینا پٹ ءُ پول ٹی اونا بیگواہی ٹی اوارا کڑدار و ایلو گِڑاتا جاچ ئے ہلّنگ ئٹی اُن۔ یات مرے کہ داکان مہالو اِرا ہزار ہفت ئٹی ہم پاکستانی فوج استاد واحد کمبر ئے بیگواہ کرسہ چھانڑدہ تُو اسکان سِزا جاہ تیٹ تخا و زہنی، جسمانی سزا آن گُڈ اودے پھاش کرے و بھازا مقدمہ آتیٹ اونا گرفتاری پھاش کننگا۔ اِرا ہزار یانزدہ ٹی خواجہ واحد کمبر بلوچ غُٹ دروغ ئنا مقدمہ آتان بری مرسہ یلہ کننگاسس۔
پاکستانی ایجنسیک اِرا ہزار بیست ءُ دو ئٹی ارٹمیکو وار استاد واحد کمبر ئے بیگواہ کننگ نا کوشش کریر ولے بےسوب مسّہ۔
او پارے کہ بلوچ آجوئی دوست راہشون آتا قانود نا برخلاف خلّنگ و زورئٹ بیگواہی پاکستانی ریاستی پالیسی اے۔ پاکستان نا دا وڑ نا غُٹ کاریمک نہ بیرہ جہانی قانود آتا برخلاف ءُ بلکہ جنگی جرم، بندغی حق آتا برخلاف زوراکی و ریاستی دہشتگردی ٹی بریرہ۔
نن کوزہ گیر پاکستانی ریاست ئے پاننگ خواہینہ کہ بلوچ راہشون آتہ خلّنگ و بیگواہ کننگ ئٹ بلوج راج ئے آجوئی نا جہد آن ہِچ وڑئسیٹ توننگ مفک و نہ بلوچ راجی جوزہ ئے فوجی زوراکی ئٹ نزور کننگ مرو بلکہ دا وڑ نا گام تان پاکستان تینا جرم آتیٹ گیشتری ہتو ہرافتیک اودے اسہ دے لازمی بلوچ راج ئے ورندی چوئی تمّو۔ ننا سوگوا جوزہ ہندادے کہ بلوچستان نا آجوئی اسکان جہد برجا سلو۔
