شہدائے میہی، مشکے 30 جون 2015 آ قوضہ گیر پاکستانی لشکر نا بےدادی تا برخلاف ہرا وڑ مزاحمت و جرت نا درشانی ئے کرے او تاریخ نا پنہ غاتا خیسُن آ لوز آتے ئٹ یاد کننگ مروئے۔ شہد آتا دا وڑ ئنا قربانی تا بدولت اینو بلوچستان نا کنڈ کنڈ آ پاکستانی قوضہ نا برخلاف آ جدوجہد نا شعور ودسہ ئے۔ تاریخ ہمو کڑد آتے یاد کیک اراکہ فیصلہ کن وخت ئٹی وطن نا رکھ ئکن سبر سلیرہ ۔
بلوچ راجی جنزِ آجوئی ہندا شہید آتا قربانی تا بدولت روان ئے و سبر ءِ ۔ شہید آتا ہندا عظیم ئنگا سدخئیک بلوچ راج ئے شعور نا انتہا غا سر کرینو کہ بلوچستان آ قوضہ گیر ئے ہمو وخت ئسکان امن و سکون ئٹ دم کشنگ کِن الِنگ مفروئے اراوخت ئسکا کہ داکان نرّپ ۔ دا یاد کننگے کہ قوضہ گیر ساندہ غلام راج ئتو ہمو بدترین آ چم ئے کیک کہ ارا غیر انسانی رویہ اینو ریاست پاکستان قوضہ مروک بلوچستان ئٹی بلوچ آتوں کننگے اراٹی کُشت ءُ خون ، زورانسری بےگواہی ، و جشوک آ جون تا خسنگ تون اوار ایلو بے دادیک اوار ءُ ۔
شہدائے میہی، مشکے شہید میجر سلیمان عرف شیہک جان،ذاکر جان، رمضان بلوچ، گاجی خان بلوچ،علم خان، رفیق بلوچ، فرہاد بلوچ، انیس بلوچ، خدانظر بلوچ، فیصل بلوچ، ظہیر بلوچ و سفر خان بلوچ راج ئنا ہمو عظیم ئنگا فرزند آکو اراکہ دلیری و جرت ئٹ پاکستانی زورانسری و استعماری پالیسی نا برخلاف مزاحمت نا کسر ئے تینائی کریر و وطن نا آجوئی کن جنگ کرِسہ تینا جان تا سدخئی ئے تسُر ۔ شہدا نا دا عظیم ئنگا قربانیک ننے قبائلیت ، عیلاقائیت آن پیش تمِسہ بطور بلوچ دا راجی جدوجہد نا بشخ جوڑ مننگ و دادے مضبوط کننگ نا نیمہ غا چِکرہ ۔ شہدائے بلوچستان تینا قیمتی آ جان تا سدخئی ہندا خاطران تِس تانکہ بلوچ راج آجوئی نا وقار تون زندگی ئے تیر کننگ کے ۔شہداء نا دا عظیم ئنگا نظریہ و قربانی نا جوزہ ئے مونی دننگ تون راجی جنز ئے پین زیات سبر و منظم کننگ نا ضرورت ءِ ۔
شہدائے میہی ئے اوفتا نوہمی برسی نا موقعہ غا خیسنو دروت ندر کینہ ارا عظیم ئنگا فرزند آک تینا جان ئنا سدخئی ئے ترِسہ ننے راجی آجوئی نا کسر ئے نشان تسُر ۔ بلوچ راج دا وخت پاکستان نا وڑو غیر مہزب و جابر ءُ ریاست ئسے تون مون پہ مون ءِ اراکہ ہڑدے بلوچ راج ئنا برخلاف خاخر شلنگے ۔ دا حالیت آک دا گپ ئنا تقاضہ ئے کیرہ کہ بلوچ نوجوان آک دا جہد آجوئی نا بشخ جوڑ مریر و اودے پین زیات سبر آ دروشم ئٹ مونی دیر انتئے کہ اسہ آجو ءُ بلوچستان ئس بلوچ راج ئنا بروک آ وخت ئکن ضامن مننگ کیک ۔
بلوچستان لبریشن فرنٹ دا جانباز بلوچ سرمچار آتے اوفتا عظیم ئنگا شہادت آ دروت ندر کرِسہ وادہ کیک کہ شہید آ سنگت آتا مشن ئے ہرحال ئٹی مزل آ سر کرِسہ آجو بلوچستان نا تغ ئے پورو کننگ مروئے ۔
