وائس فار بلوچ مسنگ پرسنز نا راہشون و بیگواہ آ ڈاکٹر دین محمد نا مسڑ سمی دین ویڈیو پیغام ئسے ٹی پارینے کہ کنا باوہ ڈاکٹر دین محمد بلوچ ئے 28 جون 2009 نا شام خضدار اورناچ آن ڈیوٹی نا وخت ہسپتال ئٹی پاکستان نا ڈھکوک ادارہ آک اول بے دادی نا نشانہ کریر و پدا اودے دزگیر کرسا زوراکی ئٹ بیگواہ کریر اَرا دائسکان بیگواہءِ۔
او پارے کہ اینو اسکان ننے خبر اف کہ او اراڑے کے و اَرا حال ئٹی ءِ۔
او پارے کہ دا پازدہ سال ئٹی باوہ نا سلامتی و زند ئنا بابت ئٹ چاننگ کن بندغی حق، سیاسی و چاگڑدی تنظیم تیتون اوار ننا اُرانا بندغ آک ہر مروکا کوشست ئے کریر ولے دائسکان ننے ہچ خبر متو دا وخت اسکان کیہی حکومت بدل مننگ آ ہر حکومت کنا باوہ تون اوار ایلو بیگواہ بندغ آتا آجوئی نا یقین دہانی کریفیر ولے ہر وار آ حکومت نا یقین دہانی دروغ ثابت مسُر۔
او مُستی پارے کہ کنا باوہ نا زوراکی ئٹ بیگواہی نا مُرغنا کرب، اذیت ناک پانزدہ سال پورو مننگ آ پگہ کراچی پریس کلب آ شام چار ءُ نیم بجہ آ پریس کانفرس کننگءُ۔ ہندُن سوشل میڈیا پلیٹ فارم ایکس آ چاہنداری مہم شام ہفت بجہ آن دوانزدہ بجہ اسکان#ReleaseDrDeenMohammad
ہیش ٹیگ تون اوار چلیفنگ مرو۔
کُل صحافی تیتون اوار سیاسی ،چاگڑدی، بندغی حق آتا ادارہ تہ باسک آ تیان خواست ءِ کہ او پریس کانفرنس و سوشل میڈیا آ برجاء انگا مہم ئنا بشخ مریسہ زوراکی ئٹ بیگواہ مروکا بندغ آتا آجوئی کن توار بُڑز کیر تاکہ اوفتے کربناک زند آن آجوئی رسینگ کے۔
