بلوچ یکجہتی کمیٹی نا جارکش تینا درشان ئٹی پارینے کہ کوہلو ٹی ہنوکا شش تُو آن ظلم و تادی برجا اے۔ لانگ مارچ ئٹی بشخ ہلّنگ آ ہڑدے مخلوق ئے خواہیفنگک اوفتا دوتیٹ پوسٹر تننگک ہرافتا نوشتہ مریک کہ "لانگ مارچ ئٹی بشخ ہلّنگ ننا ردی ئس اس، اینو آن پد نن بلوچ یکجہتی کمیٹی نا ہچو دیوان ئسیٹ بشخ ہلوفن” و پدا عکس کشیرہ۔ اوکا پد بندغاتِہ دا پارہ یلہ کیرہ کہ اگہ او ہمرو سیاسی و چاگڑدی عمل ئسے نا بشخ مسّہ تو دا عکس آک شنگ کننگور۔
او پارے کہ دا معاملہ ہنوکا شش تُو آن چلّنگ ئٹی اے ہراڑے لس مخلوق ئے خوار کننگک۔ ہندا رِدئٹ کیئی دے آن کوہلو نا صحافی، استاد و ایلو فکری آ بندغاتہ فون کرسہ تینے آ بنّنگ نا پاننگک، بنّنگ آ مخلوق ئے خْوار کننگک، سوشل میڈیا اکاؤنٹ آتہ چھٹفنگک و پین وخت اوفتہ چلّفنگ آ ہُوشانک تننگک۔
جارکش پارے کہ ہندا وڑ دا ہفتہ ٹی مُسہ بندغ ئے بیگواہ کننگا و اوفتہ خلّنگ آن پد لودے یلہ کننگا ولے اوفتا موبائل آتہ توننگا۔ فوج ئنا دا کار کڑد ئے خنسہ دا پاننگ مشکل اف کہ او بلوچ نا عوامی جہد آن خُلینگ ئٹی اے، ہراڑے رکھ ئنا پِن آ بلوچ ئے خلّنگ ئٹی ءُ ہموڑے دا ہم پھاش کیرہ کہ دا غُٹ چم بازیک بیرہ بلوچ ئے پد بِٹنگ و تینا وطن آن مُرکننگ کن ءُ۔
بلوچ یکجہتی کمیٹی دا ہیت ئے پھاش پائک کہ ننا عوامی جہد دا وڑ نا چم آتیٹ چُھٹوف نہ کہ بلوچ مخلوق تینا حق ئنا جہد آن پد سلو، بلکہ دا وڑ نا چم آک عوامی جہد ئٹی پین سوگوی ہتور۔
