بلوچستان نا ضلع کیچ ئنا ہند تمپ کونشکلات ئٹی پاکستانی لشکر ہنوکا شام 1:30 بجہ آن خُڑک بلوچی شعر پاروک و زرمبش زیمر نا ڈائریکٹر استاد منہاج مُکتار نا اُرا غا پاکستانی لشکر و ڈھکوک اداہ آ تا کارندہ آک چھاپہ خلکُر، زالبول و چُنا تے بےدادی نا گواچی کریر۔
دا حوالہ ئٹ بلوچ نیشنل موومنٹ نا چیئرمین ڈاکٹر نسیم بلوچ ایکس آ تینا ٹویٹ ئسیٹی پارے کہ اَسہ وار ئس ولدا پاکستانی لشکر بلوچستان نا ہند تمپ ئٹی معروف انقلابی شعر پاروک منہاج مُکتار نا خاندان آ چھاپہ خلک و اوفتا تذلیل کرے۔ تینا فن نا زریعہ ئٹ او آزاد بلوچستان نا وکالت کیک، پاکستان بلوچ راج ئے مٹائفنگ نا کوشست ئٹی بلوچی موسیقی، ثقافت و روایات آ تے سبوتاژ کننگ ئٹی ءِ۔
او پین پارے کہ ہر کس ئے بالخصوص بلوچ شعر پاروکا تے تینا سنگت فنکار آ تا برخلاف دا وحشیانہ عمل نا برخلاف توار بُڑز کیر۔
ہندون بلوچ نیشنل موومنٹ نا مرکزی انفارمیشن سیکرٹری کازی داد محمد ریحان سوشل میڈیا ایکس آ تینا ٹوئٹ ئسیٹی پارے کل پاکستانی لشکر اَسہ وار ئس ولدا انقلابی شعر پاروک و زرمبش زیمر نا ڈائریکٹر استاد منہاج مکتار نا اُرا آ چھاپہ خلکُر و اونا خاہوت ئے بے دادی نا نشانہ جوڑ کریر ۔ نن دا اقدام نا شدید لوز آ مذمت کینہ
استاد منہاج مکتار اَسہ انقلابی شعر پاروک و زرمبش زیمر نا ڈائریکٹر ءِ و اونا دائسکان کیہی البم ریلیز مسُنے۔
تینا انقلابی شعر تا سوب آن او مُدام ریاست نا زیر عتاب ءِ، اونا خاہوت ءِ مکمل ریاستی ہراسمنٹ ءِ مون تروئی تمیک، کیہی وار اونا اُرا آ سُمکاری، چھاپہ و لُٹ و پُل نا کاروائی تیتون اوار کیہی وار اوفتا جاگہ تے ہم ہُشانو، منہاج مُکتار نا بھانجا اسرار بلوچ ولد عطاء دائسکان لشکر نا دُو تیان بیگواہ ءِ ۔
یاتی مرے کل ریاستی لشکر استاد منہاج مُکتار نا اُرا والاتے اونا جنوزان ایڑ و چُنا تے تا مسلسل تنگ کریسہ ءُ، ہر بروکا دے اُرا تیٹ پیہیسہ یا کسر ئٹ اوفتے توریسہ تنگ کیرہ۔
اُستاد منہاج مُکتار نا بہنوئی عاصم فقیر ئے 26 مئی 2013 ٹی پاکستانی لشکر شہید کرے داسہ اونا چُنا تے لشکر مسلسل تنگ کننگ ءِ، اُرا ٹی چھاپہ نا وخت اُرا نا کُل قیمتی سامان، مال مویشی و موبائل فون آ تے ہم تینتو اوار درینو، پاکستانی لشکر تون چھاپہ خلنگ ٹی ہندی ڈیتھ اسکواڈ و مخبر آ تا کمک اوار ءِ ۔
سوشل میڈیا آ جتاء جتاءسیاسی و چاگڑدی باسک آک ہم استاد منہاج مُکتار نا اُرا آ چھاپہ خلنگ و اونا خاہوت ئے ازیت تننگ نا شدید لوز آ تیٹ مذمت کرینو ءَ
