پنجگور بلوچستان ٹی عکس کش کمانچر بلوچ نا یات ئٹ "اوئیسس پبلک اسکول” ٹی تقریر و کتاب مُچی نا دیوان ئس اڈ تننگا۔
دیوان ئے چاگڑدی کاریم کروک شاہ زیب منیر، داؤد رئیس و سمیع اللہ بلوچ تینا کمک ئٹ اڈ تسّر، ہراٹی بھازا خواننگ جاہ (اسکول) تا خوانندہ مار و مسِنک بشخ ہلکُر۔ دیوان ئٹی ایلو مخلوق ہم بھلو کچ ئسیٹ ساڑی اس۔
دیوان نا بھلا مہمان ڈپٹی میئر عبدالباقی بلوچ اس، ایلو مہمان تیٹ دی اوئیسس اسکول نا بورڈ آف گورننگ نا بھلا واجہ حسین علی، استاد واجہ رسول جان، ڈپٹی ڈی او پروم محمد حیات بلوچ، پرنسپل دی اوئیسس اسکول نذر علی، حاجی منیر احمد، شمس الدین شمس، خورشید احمد، ابوبکر رودینی، عطا مہر و ایلوفک اوار اسُر۔
دیوان ئٹی کمانچر بلوچ نا بلوچ راج ئکن کروکا خزمت آتا ستا کننگا و اونا بےوخت دنیا ئے الّنگ ئے راجی نسخان ئس پاننگا۔
تْران کروکا پاریر کہ نن قلم و کتاب تون مہر کینہ، چائنداری و قلم ئٹ اسہ جْوانو چاگڑد ئس جوڑ کننگ خْواہینہ، دا رِدٹ ننا مسڑ چُنا تا بھلو کڑد ئسے۔
او پاریر کہ نشہ و سِلا چرّیفنگ ننا شون ئے پد بٹرہ ہرا چاگڑد ئے نسخان تیرہ، دافتا برخلاف چائنداری نا بنیات آ کاریم کننگ المی ءِ۔
او پاریر کہ بلوچ مخلوق مسڑ چُنا تا خواننگ آ ہم سوچ کے و مسڑ چُناتے خْوانیفِہ، ہراتم ننا مسِنک خْوانار تو ننا چاگڑد مون آ ہِنو۔
او پاریر کہ پنجگور نا تعلیمی نظام ٹی بدلی ہتنگ نا بکار ءِ ہرا بھاز مُتکن مسّنے۔ خواننگ جاہ ارے تو استاد اف، استاد ارے تو خْواننگ جاہ او حالت ٹی اف کہ اوڑے خْوانیفنگ مرے۔
مُستی پاریر اگہ نن ہندن تینا ویل آتان خن تے تر کرین تو تاریخ ننے بشخوف، علم و زانت آن خڑک مننگ ئٹی ننا شونداری ءِ۔ بلوچ راج ئنا مونا بنّنگ ئٹی نیاڑی تا کڑد گیرام کننگ مفک۔ کمانچر بلوچ نا باروٹ ہیت کرسہ پاریر کہ او تینا وطن تون بھاز مہر کریکہ، تینا کیمرہ نا وسیلہ ئٹ بلوچستان نا ڈغار نا عکس آتے کشّاکہ و بلوچ دود و مخلوق تون تفوک ویل آتے پھاش کریکہ۔
ایسر ٹی اکبر غمشاد پوزیشن ہفّوکاتا پِن تے پارے و نغد انعام، شیلڈ و میڈل تننگا۔
