بلوچ راجی زْرمبشت (بی این ایم) جنوبی کوریا ہنکین گْوادر بلوچستان ئے واڑ خلنگ نا برخلاف بوسان اسٹیشن آن خڑک برانزی مظاہرہ کرے۔
مظاہرہ کروکاک بینر و کارڈ ہرفیسہ ارافتا گْوادر ٹی واڑ کننگ نا برخلاف نوشتہ اسّک۔
بی این ایم نا نیمہ آن پاننگا کہ واڑ کننگ آن ہندی آ مخلوق نا روزگار و سواد ئٹ زندہ رہینگنگ ئے نسخان رسینگک۔
برانز نا مکست بلوچستان ٹی زور ئٹ بیگواہی و بندغی حق آتیک خْوارا بندغاتیک توار ہفّنگ اس، او پاریر کہ واڑ ئنا مکست ہندی آ بندغاتا حق ئے خلّنگ و پیشن نا کاروباری تا آسراتی ءِ۔
برانز ئٹی آغا فیض تْران کرسہ پارے کہ اینو نن بلوچ راجی زْرمبشت (بی این ایم) نا توار آ پاکستانی ریاست نا کُنڈان گْوادر ئے واڑ کننگ نا برخلاف داڑے مُچ مسّن اُن۔ نن بلوچ راج آن اُن اراڑا پاکستان نا کوزہ ءِ، ننا بندغاتے ریاستی فوج ہڑدے خَلیک و بیگواہ کیک۔ نن دا پِن ئنا اسلامی ریاست پاکستان نا غلامی ئے منّپنہ۔
او پاریر کہ گْوادر ئے واڑ کننگ چین پاکستان کاروباری کسر (سی پیک) نا کاریم نا بشخ ئسے، ارادے اوفک اسہ کوزہ گیری چم ئس پاریر ارانا مکست گْوادر ئے چین ئے تننگءِ۔
اوفتا پاننگءِ کہ سی پیک آن پد گْوادر نا ہندی آ مخلوق ئے تینا ڈغار آن کشنگ کِن خْوار کننگک و اوڑا ظلم و تادی کننگک۔
داکان مُست گْوادر ئے فوجی چھاونْڑی، چوکی و کیمپ آک پلویڑ کرینُو، داسا تیوعہ شار ئنا دامون ایمون واڑ کننگک۔ اوفک پاریر کہ دا ‘اقوام متحدہ’ نا بندغی حق آتا پامالیءِ ۔ برانز نا وخت پمفلٹ ہم بشخینگا، ارافتیٹ ہندی آ بلوچ مخلوق آ گْوادر ٹی ریاستی واڑ کننگ نا اثر، مخلوق آ فوجی وڑٹ قوضہ نا ودّیکی نا بابت پاننگا۔
