فدائی حمل مومن
مٹ: نزہت بلوچ
زرمبش نوشتانک|
ایہن اراتم نُم ہیت کیرے تو ہیت کننگ نا انت مسخت مریک ؟ اراتم نی جاگہ سے آ تولوک ہیت کیسہ و دا تپیسہ کہ ہیت آتا انت ایسر مرو و ایلو نیمہ آ نی دا ہیت ئے عمل ئٹ ثابت ہم کیسہ تو ہیت آتا انت ایسر مرو ؟
جنگ ئنا وخت ای دا خنانُٹ کہ جنگ ئے ننا راج و بندغ آک بیرا لذت، خواہش و تمنا پوہ مریرہ ۔ و دا پارہ کہ جنگ ئے دُن مروئیءِ جنگ ئے اون مروئیءِ جنگ دُن کروئیءِ، دُن جوان افک، دانگا داخس بندغ خلنگار، دانگا داخس بندغ آتے خلوئی اسک،اینگا دُن جنگ کروئی ئس ۔ دا ہیت آتا بنیاتی مسخت دادے کہ ننا لس و بیرا پِن ئنا دانشور آک اوفتا دا خیالءِ کہ امر فلم آ تیٹی گڑاس نشان تننگ مریک،اوفتا خیالءِ کہ جنگ ئے ہم فلم نا وڑ شوٹ کننگ مرے و اوفتے نشان تننگے کہ جنگ دا وڑ کیرہ و دا دہ یا پانزدہ منٹ ئے ارا وڑ ہُریرہ اوفتے تہہ ئنا خوشی محسوس مریک اوفک خاصءُ تنقیدی نقطہ نظر ئٹ ہرپسا کہ دا دہ یا پانزدہ منٹ نا جنگ ئے اوفک او وڑ ہُننگ کپسہ و پارہ کہ نُم دانگا ردی کرینرے دا پاپسہ کہ جنگ راستی ئٹ تباہی نا عمل ئسے و دا خوائپسہ کہ جنگ ئٹی راستی ئٹ انگا دماغ آتا بکارءِ او تو بس ہندا خوائرہ کہ جنگ مرے۔
جنگ بیرا سُم خلنگ، توفک ہرفنگ و دشمن ئے خلنگ نا عمل اف۔ راستی ئٹ جنگ تہہ ئنا عمل ئسے ارا وخت اَسہ بندغ ئس تینا تہہ ئنا جنگ ئٹ سوب مند مس گُڑا جہان نا امرو جنگ ئسے تون اودے مون تروئی تمے او جنگ اوڑکن ہچ معنٰی تخپرو ولے ننا بندغ آک تہہ ئنا جنگ ئے شعوری سانچہ ٹی شاغپسہ او بیرا ہُننگ خوائرہ کہ چار ورنا چار بلوچ مَش ئسے آ توسنو و جنگ کننگ ءُ او دشمن ئے امر خلیرہ ومَش تیٹی امرو حالت آ تیٹی مشکل آ تیتون جُہد کننگءُ ۔ او دا گڑا تہ بابت ئٹ ہچ سوچ خلپسہ بس او دا پاننگ آ دمدرینگپسہ دانگا داخس بندغ شہیدمسُر چار ہنار و شہید مسُر دا کُل بے فائدہ ءُ نئے جنگ ئے فائدہ سر مس نئے راج ئے فائدہ ئس مس ہچ متو ۔
دا ہمو بے بنیات و دلیل ءُ ارافتے بندغ آک تینے زندہ تخنگ کن کیرہ کہ ارافک ہچ ئس کننگ کپسہ او ہندنو ہیت آتیان کمک ہرفیرہ،او ہندنو ہیت آتے مونی ہتیرہ۔
ای اگہ اینو ہچ ئس کننگ کپرہ ولے ارا بندغ بھاز نہ ولے اخس کننگ ءِ مچٹ ہم کننگءِ او انتءِ کننگءِ اودے ہم کنا وڑ مروئی ءِ چار بینر، پمفلٹ و عکس دوٹی تہ مریر و دا نعرہ خلے کہ ” یہ جو غنڈہ گردی ہے،اسکے پیچھے وردی ہے۔“و ” نہیں چلے گی نہیں چلے گی غنڈہ گردی نہیں چلے گی۔“ او ہندا وڑ نا نعرہ تیٹی زندہ مننگ خوائک۔
نی آزات ءُ چاگڑد ئسے ٹی افیس کہ نعرہ خلیس، آزات ءُ ملک ئسیٹی افیس کہ نعرہ خلیس کہ نے آزات اِنگا درشان نا حق مرے نی بیوس انگا بلوچ و لس بلوچ ئسے اُس تینا ارزشت ئے اُستان دپبو۔ غلام نا ارزشت ئے پوہ مبو و اِرٹمی دا کہ نی ارا چاگڑد ئٹی تینا زندئے گدریفنگ اُس و خواننگ اُس المی اف کہ نا چاگڑد ہم ہمو وڑ مرے نا دشمن ہمو وڑ مرے و المی اف کہ خراب انگا پروپگینڈہ و بے بنیات ہیت آک مریر و نی اوفتا بشخ مریس ۔
ہر زمین نا تینا جتا تب،راستی و حالت مریک۔اوفتا رسم و رواج سوچ و ہُننگ نا انداز صلاحیت مریک، مَنٹ نا کم و منٹ نا زیات مریک ولے نن دا معاملہ تے خوڑتی ئٹ ہُپنہ بلکہ ہمو گڑاتے خوڑتی ئٹ ہُرینہ کہ اگہ کس جنگ ئنا بشخ جوڑ مریک تو انتءِ دا بندغ تون مسُنے او انتءِ فلاں پلیٹ فارم آن تعلق تخاکہ۔راستی ئٹ ہیت دادے کہ دشمن آن زیات تین پہ تین جنگ مننگ ءِ۔ فلاں لیڈر جوڑ مننگءِ فلاں نا پارٹی ٹی بندغ آک بھاز ءُ فلاں ٹی کم ءُ دا تینتون جنگ و بے سُہب ءُ کوشست ءُ راستی ئٹ دا دشمن نا نفسیات و سوچ ءِ۔ ارا جُہد کیرہ او دا ہُرپسا کہ اَرا پارٹی ٹی اخس بندغ ءُ دیر زیات قربانی تننگءِ او بیرا دا ہُریرہ کہ اگہ کس قربانی تیک و قربان مننگ کن تیارءِ و گلزمین نا سوچ کننگءِ و تینے قربان کننگءِ قربان مننگ نا ہمو وخت امر مرو ارا وخت او قربان مننگ ئٹی مرو ۔
راستی ئٹ ننا ہیت آک دُنو افس نن دائسکان تینا دائرہ ٹی زندہ اُن ہئو دا راست ئسے کہ نن بھلو دعویٰ کینہ نن راجی بقائے رکھیفنگ کن جُہد کننگ اُن نن دا، دا کاریم تے کرینُن و دا نعرہ تے خلکُنن ۔ ولے نن دا ہرپنہ کہ ارا قربان مننگ ءُ او دیر کن قربان مننگ ءُ اینو نی پرسکون و آسائش خُ جاگہ سے آ رہینگ ئٹی اُس اگہ نا مون آ زمینی راستی افس اگہ مرے ہم نی اوفتے ہُننگ کپیسہ ۔ چار ورنا اراوخت پیشتمیرہ و تینا زندئے قربان کیرہ قربانی نا انت سوب مریک؟ ولے نی دا سوب آتے پٹیپیسہ نی بیرا پاسہ کہ دا ورناک دا جاگہ آ دا وخت آ ہنانو دا غلطءِ۔
تینا زمین کن قربان مننگ و دشمن آ قہر شاغنگ غلطءِ ؟ دا سوچ ئنا خواجہ نی ہم افیس و نی ہم دا خوائپیسہ ، ولے اصل زد و کینگ دا افک کہ او چار ورنا شہید مسُر بلکہ مسئلہ دادے کہ فلاں ادارہ نا کمک ئٹ شہید مسُر کنتو انتءِ الوس۔ مسئلہ دادے کہ ارا وخت دا ادارہ نا تینا باسک ئس دا کاریم ئے کے تو نی اودے و اونا عمل ئے بھلُن کیسہ
و مونی ہتیسہ۔ شہید آک کُل برابر ءُ و اَسہ وڑ ءُ اوفتیٹی فرق کننگ کپنہ، نی اخس فرق کیس زمین فرق کپک و ننا بندغ آک فرق ودی کیرہ۔ ننا بندغ آک جنگ ئنا وخت جنگ اکن سوچ خلنگ آن زیات تینا سوچ ئے خلیرہ دا وڑ جنگ اکن سوچ خلنگ مفک اراوخت جنگ ئنا سوچ ئے خلوفیس گُڑا احساس کمتری، مایوسی و اَسہ ایلو آن اُست کُبین مننگ نا حالت ودی مرو و دا حالیت آک بھاز درد ناکءُ اَسہ راج اسہ و زمین نا رہینگوک کن، ہمو وخت ارا وخت اوڑکن المی ءِ کہ او جنگ کے اودے سرسُہبی نا نیمہ آ دے و دا رسم جہانءِ کہ اگہ کس کتاب خوانک یا آزات ءُ چاگڑد ئسیٹی رہینگکو پین ملک ئسے او خنانے کہ بندغ آک اوار ءُ و او دا پارہ کہ دا وڑ مروئی الوکہ ۔ بدبخت نی تینا ارزشت ئے پوہ مر کہ نی غلام اُس و غلام نا ارزشت ئے پوہ مر کہ غلام نا اوقات اخسءِ۔
دائسکان دا مسئلہ سے کہ نن تینا ارزشت ئے پوہ متنون ۔ دا ہمو حالت ءِ کہ خَنک بند ءُ و کُل گڑاتے ہُننگ خواہیرہ خن تے ملوئی ءِ اراوخت خنتے ملوفیس تو انت ہُننگ کروس اگہ خنس ہم اَسہ خیالی عکس یا ندارہ ئس تینا ذہن ئٹی جوڑ کیسہ اودے ہُننگ خواہیسہ و برجاء تخنگ خواہیسہ ۔ مَنہ جاگہ آ تیا خَن تہ روشنائی بھاز کم مریک پاش ءُ ہیت ئسے اراوخت تارمئی مرو تو نی بیرا ہمو تارمئی ءِ خنوس و تارمئی آن بیدس پین ہچ خنوفیس۔ اراوخت ہچ خنوفیس تو ہمو زوراکی ئٹ بیگواہی تہ قصہ، زوراکی ئٹ بیگواہی آن کنے یات بس کہ ننا بندغ آک بلوچ جنگ و تحریک ئے بیرا دا پوہ مریرہ کہ اراوخت نی زوراکی ئٹ بیگواہ مروکا بندغ آ تیکن چار چارٹ ہرفیس و نعرہ خلکُس گُڑا بس داسا نی تینا سرزمین کن جنگ کننگ اُس ۔ ولے سرزمین کن جنگ کننگ دا افک سرزمین کن جنگ دادے کہ نی ومر جنگ کیسہ تینا بندغ آتا رکھ ئے کیسہ ۔ اگہ دا بندغ آک زوراکی ئٹ بیگواہ مننگ ءُ نی ہفتاد ءُ پنج،شش و ہفتاد ءُ ہفت نا سفر ٹی اخس بندغ رکھیفنگ کرینُس ۔ اراوخت توفک مرو توفک نا رکھ ئے کننگ کرو۔ وختی حساب ئٹ مننگ کیک کہ نی نسخان تے اراڑان نزور اُست و ہمو ارافتیٹی حوصلہ کم مریک گڑا اوفتے کن حیران کروکو ہیت ئس مرو ،
ہنداکان قصہ نا بناء مرو کہ نی بھلو قربانی تیس و قربانی نا اَسہ سلسلہ ئسے نا بناء مرے و ارا ذہن دا ہیت ئے مننگ کن تیار مرے کہ اینو اگہ نن قربان مننگ اُن تو چار ورنا پین برور قربان مرور جنگ کرور و زمین نا رکھ ئے کرور ۔ اراوخت دا سوچ مونی ہنو دشمن جاگہ نا جاگہ سے آ نزور مرو۔ دا برانز و پمفلٹ دو ٹی کننگ آ دشمن ئے ہچ مفک دشمن نا ہچو نسخان مفک اگہ نی دشمن ئے مچٹ ءُ نسخان ئس ہم تننگ کپیسہ دشمن نا سپاہی ،جنرل ،کرنل و اونا لشکرئے امر تینا ڈیہہ آن کشنگ کیسہ۔ سوچ خلوئیءِ ہنداخس سوچ خلوئیءِ کہ سوچ خلنگ نا ایسر ئس پیشتمے ۔
