بلوچ نیشنل موومنٹ نا جارکش تینا شنگ مروکو درشان ئسیٹی پارے کہ نُہہ اپریل بلوچ راجی تاریخ نا اسہ بدبختو دے ئسے، ارادے پاکستان راج دوست و بی این ایم نا بنجاہی کماش واجہ غلام محمد بلوچ و اونا سنگتاک لالا منیر بلوچ و شیر محمد بلوچ ئے مرگاپ ئٹی شہید کرے و بلوچ راج آن اسہ بھلّو رہشون، زانت کار، شاعر و ہمت و سوگوی نا چیدہ ئس پُھلا ۔
"نُہہ اپریل آ مُچ چیپٹر، زون و سیلز آک چیئرمین نا یات و فکر آ دیوان اڈ تیر و اونا چائنداری نا روشنائی ٹی پوسکنا وخت ئنا مشکل آتے مُر کننگ کِن رہشونی ہلیر۔”
جارکش پارے کہ چیئرمین غلام محمد بلوچ تینا راج دوستی نا فکر، فلسفہ و سوگوی و مخلصی ئٹ بلوچ راجی کاروان ئے مُستی درے۔ دا اونا زانت ئنا وسیلہ ءِ کہ دشمن تینا غُٹ چم بازی، خلّنگ بِٹنگ و سزا تننگ آن پد ہم بلوچ راج ئے اونا راجی کاروان آن مُر کننگ ئٹی بے سُہب مسّنے۔ دانا عوض ٹی ہردے راجی فکر ٹی پین سوگوی بنّنگ ءِ و بھاز شابیتی ئٹ مُستی گام خلّنگ دا تحریک نا سرسُہبیءِ۔
او پارے کہ چیئرمین غلام محمد بلوچ نا حوصلہ، فکر و سوگوی سخت اِنگا آ وخت آ ننے تمّنگ الّیپک۔ تہارا کسرتیٹ نن کِن چراغ نا کاریم ئے کیک۔ دا چیئرمین شہید نا کردارءِ کہ پاکستان بلوچ راج ئے غلامی، لٹ و پُل، خْواری و بےخوانندئی نا گْواچی کریسس، راجی فکر نا ختم کِننگ کن کُل کسر تِہ کاریم ئٹی ئس ولے غلام محمد بلوچ غلامی نا تہاری ٹی کسر گُم کروکا راج ئے روشنائی نا نیمہ غا ہتنگ کِن جہد کرے۔ اینو بلوچ ئٹی غلامی نا مارشت ہنداخس جاگہ کروکے کہ دنیا نا ہچّو لالچ، آسراتی و خوف ئس اودے غلامی آن نفرت و آجوئی نا جوزہ آن توننگ کپّک۔
جارکش پارے کہ ببو تینا عظیم انگا رہشون ئے سلام ندر کین، آجوئی کِن تینا کردار ئے مدام زندہ تخنگ کِن چیئرمین شہید نا کسر ئے ہلین۔ غلام محمد بلوچ بیرہ پارٹی نہ بلکہ غُٹ راج ئنا رہشون ئس، تو تینا رہشون ئے پارٹی تو اوار مرسا یات کین و سوشل میڈیا غا #MartyrsOfMurgaap
مہم ئٹی جْوانی ئٹ بشخ ہلین۔
