اسرائیلی وزیراعظم بنجمن نیتن یاہو نا جنگی کابینہ نا اسہ باسک ریٹائرڈ جنرل بینی گانٹز یک شمبے نا دے پارے کہ اگہ حماس رمضان المبارک بناء مننگ آن مُست غزہ ٹی بندی کروک یرغمالی تے یلہ کتو تو رفح ٹی جنگ برجاء مرو۔
گمان اندن ءِ کہ اوڑے رمضان 10 مارچ آن بناء مرو۔
اسرائیلی لشکر دو شمبے نا دے غزہ نا جاندمی پٹی ٹی فضائی و زمینی کارروائی کرے ہراڑے فلسطینیک بھلو کچ ئسیٹی پناہ ہلکسر۔
غزہ نا محکمہ صحت نا کوالخواہک پارینو کہ اکتوبر آن دائسکان بیران مروکا فلسطینی تا کچ داسا 29000 آن زیات مسنے۔
اسرائیلی لشکر دو شمبے نا دے پارے کہ او غزہ نا جاندم ئٹ کل آن بھلا علاقہ خان یونس ئٹی اہداف تیا جلہو کرینے۔
غزہ و خڑک ئنا آبادی تیان نروک فلسطینی تا بھلو کچ ئس مصر نا سیمی کسر نا خڑک پناہ ہلکنو۔ اسرائیل نا پاننگ ءِ کہ اوڑے حماس نا جنگجو ارے و او اوفتا ایسری اسکان تینا جنگ ءِ برجاء تخو۔ ہراڑان جہانی تلہ غا خلیس ئٹ ودکی مننگ ءِ۔
