بلوچ نسل کُشی ، زوراکی ئٹ بیگوائی و بیس عدالت آن خلنگ نا برخلاف شال ئنا شاہوانی اسٹیڈیم ئٹی قومی جلسہ عام برجاء ءِ ۔ ہراٹی ہزار آتا کچ ئٹ بندغ آک بشخ ہرفینو، اسٹیڈیم نا پُر مننگ نا سوب آن کیہی بندغ آک پیشن توسُنو ۔
جلسہ عام ئٹی شال آتون اوار مکُران ، جھالاوان ، سراوان ، کراچی و کوہ سلیمان آن زالبول ، چُنا و زوراکی ئٹ بیگواہ مروک آ بندغ آتا خاوت آک بھلو کچ ئسیٹی بشخ ہرفینو ۔
جلسہ عام آ پاکستانی لشکر نا دُو آن زوراکی ئٹ بیگواہ آ بندغ آتا خاوت آک اسٹیج آ تولوکءُ و تینا بندغ آتا بیگواہی تہ بابت ئٹ ہیت کرسا اوفتا آجوئی نا خواست کننگءُ۔ ہندُن بلوچ یکجہتی کمیٹی نا نیمہ آن بلوچستان ئٹی اقوام متحدہ نا فیکٹ فائنڈ مشن کن بندغ آک پٹیشن آ دستخط کریر ۔
بلوچ وائس فار مسنگ پرسنز نا وائس چئیرمین ماما قدیر بلوچ ،صبغت اللہ بلوچ ، ڈاکٹر ماہ رنگ بلوچ و پین ہیت کروک آک پاریر کہ دا عوامی دریا ریاستی جبر ئنا برخلاف بلوچ نا ریفرینڈم ءِ ۔ بلوچ دا فیصلہ ءِ کرینے کہ نسل کُشی و زوراکی ئٹ بیگواہی تہ سلسلہ بند کننگ مرے ۔
اوفک پاریر کہ ہراتم نن اسلام آباد آ ہنان تو ننے پاریر کہ بلوچیک پیشتمبو، نن پیشتمان ننے ہندا پاننگا کہ بلوچستان نن نُمے بلوچستان آ ہننگ نا اجازت تفنہ ۔
ہندا وخت آ اسٹیج آ بلوچ راہشون آک زوراکی ئٹ بیگواہ آ بندغ آتا خاوت آتے بلوچی گُد و خِیری تِسُر ۔
صبغت اللہ شاہ جی بلوچ اسلام آباد ئٹی بلوچ زالبول آتون زوراکی نا بابت ئٹ بنوک آ بندغ آتے پارے کہ اوفک اسلام آباد ئٹی مروک آ کُبین آ چیلنج و ریاست نا بلوچ نسل کُشی نا پالیسی تہ بابت ئٹ بلوچ عوام ئے آگاہی تِسُر ۔
او پارے کہ نن ہچ بر اُستان دروفن کہ اسلام آباد ننا لُمّہ و ایڑ تیتون کُل دنیا نا مونا امر پیش مس ۔
جلسہ عام ئٹی بندغ آک بلوچ نسل کُشی و ریاستی جبر ئنا برخلاف آ نعرہ خلکُر و بلوچ قومی شعر پاروک استاد میر احمد بلوچ و ایلو فنکار آتا توار ئٹ ترانہ خف توریفیر ۔
