بلوچستان ٹی کانگو وائرس آن اِرا ناجوڑو دنیا ئے الّار ہندن مسٹ بھاز تکلیف ءُ و پین چھار ناجوڑو نا پِن بسّنے۔
شال ئٹی کانگو وائرس آن اسہ نیاڑی سے تون اوار اِرا بندغ دنیا آن ہِنار، ساہ تروکاتیٹی قلعہ سیف اللہ آن بی بی عائشہ و غوث آباد شال آن عبدالقیوم اوار ءُ۔ و چھار پین بندغ ٹی ہندا ناجوڑی پھاش مسّنے۔
ناجوڑ آتا بوز و باء آن دتر بنّنگ و سخت ہِڷ مننگ آن اوفتہ اسپتال آ راہی کریر۔
ناجوڑ آتا عمرک بیست ءُ سئے سال آن پنجا ءُ پنچ سال اسکان ءُ، ہرافتان اسٹ شال، اِرٹ قلعہ سیف اللہ و اسٹ کابرشور توبہ کاکڑی پشین آن اے۔ دافتیٹ مسٹ تا بھاز تکلیف ءُ۔
اینخو نا سال کانگو وائرس آن ناجوڑاک یانزدہ ءُ و اِرا بندغ دم تسّنہ۔
اقوام متحدہ نا صحت نا عالمی ادارہ ڈبلیو ایچ او نا پاننگ کہ کانگو وائرس ہرادے کریمین کانگو ہیمرجک فیور (سی سی ایچ) پارہ۔ ہِڷ ئنا اسہ زیل ئسے ہرا لس وڑٹ چِچُڑ آتان ہلیک، ہرا سہدار تا تھڑنگ نا وخت آ ہم ہلیک۔
کانگو وائرس نا تالانی لس مخلوق نا جان جوڑی کن پریشانی سے، انتئے کہ دا ویل وبا ئس مننگ کیک ہراٹی دہ آن چِھل فیصد اسکان مخلوق نا موت مننگ کیک۔ ہرانا توننگ ڈُکھیا مریک۔
کانگو وائرس افریقہ، بلقان، مشرق وسطی و ایشیا ٹی جہی اے، دا ویل اولیکو وار نوزدہ سد ءُ چِھل ءُ چھار ئٹی جزیرہ نما کریمین ٹی پھاش مس ہرادے کریمین ہیمرجک فیور نا پِن تنّگا۔نوزدہ سد ءُ شست ءُ نُہہ ٹی پاننگا کہ کریمین ہیمرجک ہِڷ نا پیتھوجین ہمو اس ہرا نوزدہ سد ءُ پنجا ءُ شش ئٹی کانگو بیسن ٹی درست مس۔ اِرا جاگہ نا پِن تا ملّنگ نا سوَب ویل و وائرس نا ساڑی آ پِن پیشتما۔
